TƏCİLİ XƏBƏR İsrail Qəzzanı işğal planını təsdiqlədi 60 min ehtiyat əsgər səfərbər olunur

İsrail müdafiə naziri Katz bu səhər Baş Qərargah rəisi Zamir və ordu qərargahı ilə Qəzza şəhərinin işğalı mövzusunda keçirilən görüşün ardından, ordunun şəhəri ələ keçirmək planını təsdiqləyib.

Bir Milyon Fələstinlinin Köçürülməsi Plana Daxildir

Müdafiə naziri Katzın şəhəri nəzarətə götürmək planı çərçivəsində, təxminən 1 milyon fələstinlinin bölgənin cənubuna köçürülməsi üçün aparılan hazırlıqları da təsdiqlədiyi bildirilib. Şəhərə qarşı planlaşdırılan hərbi əməliyyatlara "Gideonun Döyüş Arabaları II" adı verilib.

Qeyd edək ki, İsrail 18 mart tarixində atəşkəsi pozduqdan sonra, 17 mayda Qəzza Şeridindəki hərbi mövcudluğunu genişləndirmək və daimi etmək məqsədilə "Gideonun Döyüş Arabaları" adlı hücumlar başlatmışdı.

60 Min Ehtiyat Hərbçi Səfərbər Edildi

İsrailin KAN dövlət televiziyasının məlumatına görə, Qəzza şəhərində irəliləyişə hazırlaşan İsrail ordusu 60 min ehtiyat hərbçini xidmətə çağırmaq qərarı verib. Baş Qərargah rəisi Eyal Zamirin dünən gecə şəhərə dair hərbi planı müdafiə naziri Yisrael Katzə təqdim etməsindən sonra alınan bu qərarla yaxın günlərdə 60 min ehtiyat hərbçi silah altına alınacaq.

Xidmətə çağırılacaq ehtiyat hərbçilərin hamısının bu hərbi əməliyyatlarda iştirak edəcəyi gözlənilməsə də, şəhərə hücumlar davam edəcəyi təqdirdə ordudakı ehtiyat hərbçi sayının 130 minə çatacağı proqnozlaşdırılır.

Sözügedən qərar, Müdafiə naziri Katzın Baş Qərargah rəisi Zamir və ordu qərargahı ilə Qəzzaya dair hərbi planın müzakirə edildiyi toplantıdan sonra verilib.

Hadisələrin İnkişafı və Keçmiş Hərbi Nəzarət

İsrail Təhlükəsizlik Nazirlər Kabineti 8 avqust tarixində bölgənin şimalındakı Qəzza şəhərinin nəzarətə götürülməsinə dair planı təsdiqləmişdi.

Baş nazir Binyamin Netanyahu Nazirlər Kabinetinin iclasından əvvəl verdiyi müsahibədə Qəzza Şeridinin tamamını ələ keçirməyi hədəflədiklərini bildirmişdi.

İsrail mətbuatında yer alan xəbərlərdə də ordunun Qəzzanın qalan hissəsinə daxil olmaq əmri aldığı, lakin bu addımın sentyabr ayından əvvəl həyata keçiriləcəyi gözlənilmədiyi qeyd edilmişdi.

Plana görə, ilk mərhələdə təxminən bir milyon fələstinli cənuba köçürüləcək, şəhər mühasirəyə alınacaq və sıx hücumlardan sonra hərbi nəzarətə alınacaq.

İkinci mərhələdə isə əsasən xarabalığa çevrilmiş Qəzzanın mərkəzindəki qaçqın düşərgələrinə giriş nəzərdə tutulur.

İsrail 1967-ci ildən 2005-ci ilə qədər 38 il ərzində Qəzza Şeridini işğal altında saxlamışdı. Bu gün təxminən 2.4 milyon fələstinlinin yaşadığı Qəzza Şeridi 18 ildir ağır blokada altındadır.

24 saat