Tufan Erginbilgiçin Rolls-Royce-dəki rekord maaş artımı müzakirələrə səbəb olub

Rolls-Royce-un türk rəhbəri Tufan Erginbilgiç tarixi maaş artımı ilə diqqət mərkəzindədir

Böyük Britaniyanın mühəndislik nəhəngi olan "Rolls-Royce" şirkəti icraçı direktor Tufan Erginbilgiçin illik gəlir limitini əhəmiyyətli dərəcədə artırmaq barədə qərar qəbul edib. Şirkətin rəhbər heyətində rəqabətədavamlılığı təmin etmək məqsədilə atılan bu addım dünya mediasında geniş müzakirələrə yol açıb.

Məlumata əsasən, Tufan Erginbilgiçin maaşında 550 faizə qədər artım nəzərdə tutulur. Bu dəyişiklik onu təkcə dünyanın ən yüksək maaş alan türk rəhbərlərindən birinə çevirmir, həm də qlobal miqyasda ən çox qazanan idarəçilər siyahısında ön sıralara çıxarır.

Şirkətin bu qərarı, Erginbilgiçin rəhbərliyi dövründə nümayiş etdirdiyi yüksək nəticələrə və "Rolls-Royce"un maliyyə göstəricilərindəki müsbət dinamikaya verilən dəyər kimi qiymətləndirilir. Qlobal bazarlarda rəhbər heyəti qoruyub saxlamaq üçün belə yüksək rəqəmlərin təklif edilməsi sektor üçün yeni bir standart hesab olunur.

Sözügedən artım planı şirkətin səhmdarları və investorlarının diqqət mərkəzindədir. Tufan Erginbilgiçin rəhbərliyi altında şirkətin qarşıdakı illərdə daha böyük uğurlara imza atması hədəflənir.