Azərbaycandan Serbiyada 600 milyon avroluq nəhəng enerji layihəsi

Serbiyada yeni elektrik stansiyası üçün Azərbaycan sərmayəsi

Azərbaycan elektrik enerjisi istehsalı - Azərbaycandan Serbiyada 600 milyon avroluq - Azərbaycan Serbiyada elektrik enerjisi istehsalı sahəsinə növbəti sərmayəsini yatırmağa hazırlaşır. Bu barədə razılıq Azərbaycan Prezidenti İlham Əliyevin bu yaxınlarda Serbiyaya etdiyi səfər zamanı əldə olunub.

Serbiya Prezidenti Aleksandar Vuçiç fevralın 15-də Prezident İlham Əliyevlə keçirdiyi birgə brifinqdə Azərbaycan şirkətlərinin iştirakı ilə yeni elektrik stansiyasının inşa ediləcəyini bəyan edib. O, həmin gün Serbiyanın qaz şirkəti ilə Azərbaycan Dövlət Neft Şirkəti (SOCAR) arasında müvafiq əməkdaşlıq sazişinin imzalandığını bildirib.

Stansiyanın gücü, yeri və istismara verilmə tarixi

Aleksandar Vuçiç layihənin detallarını da açıqlayıb: “İnanırıq ki, 2029-cu ilə qədər qazla işləyən elektrik enerjisi stansiyasını açacağıq”. Onun sözlərinə görə, stansiyanın tikintisi üçün Niş şəhəri ətrafında üç potensial məkan – Tripale, Kruşti və ya Nişka Banya nəzərdən keçirilir, lakin Kruşti variantı daha münasib hesab olunur.

Prezident Vuçiç bunun Avropa İttifaqının da tanıdığı təmiz enerji layihəsi olduğunu vurğulayıb. Stansiyanın ümumi gücünün 500 meqavat təşkil edəcəyi planlaşdırılır. O, həmçinin Prezident Əliyevin məsələni şəxsi nəzarətində saxlayacağına dair söz verdiyini də əlavə edib.

Layihənin dəyəri və səhm bölgüsü

Yeni elektrik stansiyasında Azərbaycan şirkətləri 50 faizlik səhm payına sahib olacaqlar. Bu, Serbiyanın enerji təhlükəsizliyində mühüm rol oynayacaq birgə layihədir.

2025-ci ilin sentyabrında Serbiya parlamentinin sədri Ana Brnabiç yerli mediaya verdiyi açıqlamada Niş yaxınlığında təbii qazla işləyən elektrik stansiyasının tikintisi ilə bağlı Azərbaycanla danışıqların yekunlaşdığını bildirmişdi. Onun sözlərinə görə, bu böyük Azərbaycan sərmayəsi təxminən 600 milyon avro dəyərində qiymətləndirilir.

SOCAR-ın beynəlxalq enerji layihələri

SOCAR artıq bir müddətdir ki, xarici ölkələrdə elektrik enerjisi istehsalı sahəsinə aktiv sərmayə qoyur. Ötən ilin dekabr ayında şirkət Türkiyənin “GAMA Enerji” şirkəti ilə əldə etdiyi razılaşma çərçivəsində 870 meqavat gücündə istilik elektrik stansiyasını satın alıb. Bu sövdələşmənin ümumi dəyəri təqribən 225 milyon ABŞ dolları olmuşdu.

24 saat