Çimərlikdə qorxulu anlar: Qırıcı təyyarə kütlənin üzərindən sıyrılıb keçdi

İspaniyada keçən bazar günü 19-cu dəfə təşkil edilən Gijon Aviasiya Festivalı ürəkləri ağza gətirən anlara səhnə olub.

Çimərlikdə Təşviş Anları

İspaniya Hərbi Hava Qüvvələrinə məxsus bir F-18 Hornet döyüş təyyarəsi ölkənin şimal-qərbindəki Asturiya muxtar bölgəsində yerləşən San Lorenso Körfəzindəki çimərlikdə keçirilən şou zamanı manevr edərkən dəniz səviyyəsinə qeyri-adi dərəcədə yaxınlaşaraq çaxnaşma yaratdı. Göydə tərsinə çevrilmiş təyyarənin qumu yalayaraq uçuşu çimərlikdəki insanların kameralarına düşüb. Manevrini başa vurduqdan sonra sahil zolağından uzaqlaşan təyyarənin görüntüləri sosial mediada bu hadisənin qəza ərəfəsi, yoxsa hesablanmış bir nümayiş uçuşu olmasına dair sual işarələri doğurub.

'Qaçış Manevri Həyata Keçirilib'

İspaniya Hərbi Hava Qüvvələrindən verilən açıqlamada deyilir ki, "Təyyarənin pilotu uçuş yolu üzərində quş sürüsü aşkar etdikdən sonra qaçış manevri həyata keçirib. Bu, pilotun və ictimaiyyətin təhlükəsizliyini təmin edən standart bir protokoldur. Hərbi pilotlarımız gözlənilməz hadisələrə millisanıyələr içində reaksiya vermək üçün təlim keçirlər. Bu çərçivədə pilotumuz nümunəvi sürət və peşəkarlıqla nümayişi təhlükəyə atmadan potensial qəzanın qarşısını alıb. Təhlükəsizlik hər bir aviaşouda əsas prioritetimiz olub və olacaqdır."

Əvvəlki Hadisələr Və Təhlükə

Hər il təxminən 250 min insanın qatıldığı Gijon Aviasiya Festivalı 2006-cı ildən bəri təşkil edilir və İspaniyanın ən böyük aviaşoularından biri hesab olunur. Ötən ay keçirilən "Aire 25" aviaşousunda da bir EF2000 modelli döyüş təyyarəsi yüksək sürətlə uçuş edərkən quşla toqquşma nəticəsində yaxınlıqdakı San Xavyer Hava Limanına eniş etməli olub. Hadisədə heç bir can və ya mal itkisi qeydə alınmayıb. Sürətli uçuş edən döyüş təyyarələri üçün quş zərbələri xüsusilə təhlükəli olaraq qalır, çünki təyyarənin yüksək sürəti toqquşmanın təsirini eksponensial şəkildə artıra və ən pis ssenaridə fəlakətə səbəb ola bilər.

24 saat