AZƏRBAYCAN-SURİYA ƏLAQƏLƏRİNDƏ YENİ DÖVR
Azərbaycan Prezidenti Administrasiyasından verilən məlumata görə, cənab Əliyev və cənab Şara nazirlər və digər səlahiyyətli şəxslərin iştirakı ilə görüş keçiriblər. Prezident Əliyev bildirib ki, devrilmiş Bəşər Əsəd rejimi uzun illər
Azərbaycan-Suriya əlaqələrinə qarşı qeyri-dost
siyasət yürüdüb və münasibətlərdə durğunluq yaşanıb. O qeyd edib ki, Suriyada yeni hökumətin vəzifəyə gəlməsindən sonra
əməkdaşlıq perspektivləri əhəmiyyətli dərəcədə genişlənib və bunu irəlilətmək arzusundadırlar.
Suriya Prezidenti Şara Azərbaycanın Suriyaya göstərdiyi qardaşlıq dəstəyinə görə Prezident Əliyevə təşəkkür edib. Şara deyib ki, devrilmiş rejim bir çox ölkə ilə olduğu kimi, Azərbaycanla da əlaqələri zədələyib. Lakin hazırda ölkəsinin Azərbaycan ilə siyasi, iqtisadi, mədəni, humanitar və digər sahələrdə əməkdaşlığa açıq olduğunu vurğulayıb.
ENERJİ SAHƏSİNDƏ STRATEJİ ƏMƏKDAŞLIQ
Görüşdə iki ölkə arasında xüsusilə
enerji əməkdaşlığının vacibliyi vurğulanıb. Suriyanın enerji ilə bağlı ciddi çətinliklərlə üzləşdiyi qeyd edilərək, Azərbaycan qazının Türkiyə vasitəsilə Suriyaya ixracına dair layihənin yaxın zamanda həyata keçiriləcəyi açıqlanıb. Bu layihənin Suriyanın enerji təhlükəsizliyinə mühüm töhfə verəcəyi bildirilib. Həmçinin, Azərbaycanın Suriyanın enerji infrastrukturunun yenidən qurulmasına töhfə verə biləcək imkanlara malik olduğu vurğulanıb.
Prezident Şara ölkəsinin enerji problemlərinin həllində Azərbaycanın dəstəyinin böyük əhəmiyyət daşıdığını və bunun Suriyanın inkişafına xidmət edəcəyini vurğulayıb.
TƏHSİL VƏ MƏDƏNİYYƏT SAHƏSİNDƏ ƏMƏKDAŞLIQ
Görüşdə, həmçinin, iki ölkə arasında təhsil, mədəniyyət və humanitar sahələrdə
əməkdaşlıq məsələləri də müzakirə edilib. Suriyalı tələbələrə Azərbaycanda təqaüd imkanı verilməsi və tarixi, mədəni abidələrin bərpası kimi mövzularda fikir mübadiləsi aparılıb.
Azərbaycanın işğaldan azad edilmiş ərazilərdə apardığı yenidənqurma və inkişaf işlərindəki təcrübələrinə diqqət çəkilərək, bu təcrübənin Suriyanın münaqişə sonrası yenidənqurma prosesinə töhfə verə biləcəyi ifadə olunub. Prezident Əliyev və Şara daha sonra təkbətək görüşüblər.
24 saat
