Bakıda taksi kimi istifadə edilən avtomobil Prius-a çırpıldı – zərərçəkən avtomobilin sahibi polisə və AYNA-ya müraciət edir

Az24saat.org-a edilən şikayətdə Bakı şəhərinin Suraxanı rayonu ərazisində baş vermiş yol-nəqliyyat hadisəsi, hadisədə iştirak edən avtomobilin taksi fəaliyyəti ilə bağlı sənədləri və qəzanın araşdırılması zamanı səsləndirildiyi iddia olunan ciddi fikirlər barədə bir sıra suallar qaldırılıb. Hadisə 14 avqust 2026-cı il, cümə günü saat 14:30 radələrində Bakı şəhəri Suraxanı rayonu ərazisində, “Beton yol” kimi tanınan yolda, hava limanı istiqamətində baş verib. Az24saat.org-a müraciət edən İmanov Fərid Fəxrəddin oğlunun bildirdiyinə görə, onun qanuni istifadəsində olan, 99-VE-738 dövlət qeydiyyat nişanlı “Toyota Prius” avtomobili hadisə zamanı Məmmədov Ənvər tərəfindən idarə olunub. Fərid İmanov bildirir ki, avtomobil Məmmədov Ənvərə müvafiq etibarnamə və qanuni sənədlər əsasında idarə etmək üçün verilib. Şikayətçinin sözlərinə görə, həmin avtomobilə arxadan 77-YM-983 dövlət qeydiyyat nişanlı “Chevrolet Cobalt” çırpılıb. Hadisə ilə bağlı tərtib olunmuş inzibati xəta protokolunda “Chevrolet Cobalt LTZ Minik” markalı, 77-YM-983 dövlət qeydiyyat nişanlı avtomobil və avtomobili idarə edən şəxs kimi Allahverdiyeva Çinarə Vüqar qızı göstərilib. Sənəddə protokolun Bakı Şəhər Dövlət Yol Polisi İdarəsinin polis kapitanı Əsədov Elvin Arif tərəfindən tərtib edildiyi və iş üzrə Azərbaycan Respublikası İnzibati Xətalar Məcəlləsinin 327.1, 332.1 və 469.3-cü maddələrinin qeyd olunduğu görünür.

Sürücünün adı ilə bağlı ziddiyyət

Şikayətçinin təqdim etdiyi məlumatlarda diqqət çəkən məqamlardan biri sürücünün şəxsiyyəti ilə bağlıdır. Fərid İmanov bildirir ki, həmin şəxs taksi parkının sənədlərində və ya ilkin təqdim olunan məlumatlarda “Əhmədova Bəhiyyə” adı ilə göstərilib. Lakin yol polisi tərəfindən tərtib edilmiş protokolda sürücünün adı “Allahverdiyeva Çinarə Vüqar qızı” kimi qeyd olunub.   Şikayətçi hesab edir ki, eyni şəxslə bağlı fərqli adların istifadə olunmasının səbəbi aidiyyəti dövlət qurumları tərəfindən ayrıca araşdırılmalıdır. Az24saat.org məsələ ilə bağlı hər hansı şəxsin qəsdən saxta məlumat verdiyini fakt kimi təsdiq etmir. Lakin təqdim olunan məlumatlardakı bu uyğunsuzluğun hüquqi qiymətləndirilməsinin yalnız səlahiyyətli dövlət orqanlarının araşdırması nəticəsində mümkün olduğunu qeyd edir.

“Polisə 300 manat vermişəm” iddiası araşdırılacaqmı?

Şikayətçinin redaksiyaya təqdim etdiyini bildirdiyi səs yazısında qəzanı törətdiyi deyilən qadının avtomobilin dəymiş zərərini ödəməkdən imtina etdiyi və buna əsas kimi polis əməkdaşlarına 300 manat pul verdiyini bildirdiyi iddia olunur. Səs yazısında qadına aid olduğu bildirilən danışıqda məzmunca: “Polisə 300 manat vermişəm, daha maşını düzəltdirməyəcəyəm”   mövqeyinin ifadə olunduğu bildirilir. Bu iddia son dərəcə ciddidir. Əgər sözügedən ifadənin həqiqətən həmin şəxs tərəfindən işlədildiyi təsdiqlənərsə, ilk növbədə aşağıdakı məsələlərin araşdırılmasına ehtiyac yaranır:

• 300 manatın kimə və hansı əsasla verildiyi;
• ödənişin rəsmi dövlət ödənişi olub-olmadığı;
• belə bir ödəniş edilibsə, ona dair qəbzin mövcud olub-olmadığı;
• hər hansı polis əməkdaşına qanunsuz pul verilməsi və ya belə bir təəssürat yaradılması hallarının olub-olmadığı;
• bu iddianın yol-nəqliyyat hadisəsinin araşdırılmasına hər hansı təsir göstərib-göstərmədiyi.

Redaksiya vurğulayır ki, 300 manatın polis əməkdaşına verilməsi hazırda təsdiqlənmiş fakt deyil, səs yazısında səsləndirildiyi bildirilən iddiadır. İddianın doğru və ya yalan olması yalnız Daxili İşlər Nazirliyinin xidməti araşdırması nəticəsində müəyyən edilə bilər.

Avtomobil taksi kimi fəaliyyət göstəribmi?

Şikayətçinin sözlərinə görə, 77-YM-983 nömrəli Chevrolet Cobalt taksi fəaliyyəti üçün istifadə olunur və avtomobilin işlədiyi park “Xan Park” adlanır. Parkın fəaliyyətini idarə edən şəxsin isə Vüsal adlı şəxs olduğu bildirilir. Şikayətçi iddia edir ki, yol-nəqliyyat hadisəsi baş verən zaman avtomobilin taksi fəaliyyəti üçün tələb edilən sənədlərinin, o cümlədən müvafiq yol sənədlərinin və sığorta təminatının vəziyyəti ilə bağlı problem olub və nəticədə sığorta şirkəti dəymiş zərəri qarşılamaqdan imtina edib. Bu məlumatların doğruluğunun müəyyən edilməsi üçün Azərbaycan Yerüstü Nəqliyyat Agentliyindən aşağıdakıların yoxlanılması istənilir: 77-YM-983 dövlət qeydiyyat nişanlı avtomobilə taksi fəaliyyəti üçün qüvvədə olan buraxılış kartı verilibmi? Avtomobil hansı daşıyıcının və ya taksi parkının sistemində qeydiyyatdadır? Hadisə günü avtomobil qanuni şəkildə taksi fəaliyyəti həyata keçirirdimi? Sürücünün taksi fəaliyyəti ilə məşğul olmaq üçün tələb olunan sənədləri qüvvədə idimi? Avtomobilin sığorta və digər məcburi sənədlərinin vəziyyəti necə olub? “Xan Park” adı ilə fəaliyyət göstərən təsərrüfat subyektinin AYNA sistemində hüquqi statusu nədir?

Avtomobil sahibi: “Zərər ödənilmir”

Fərid İmanovun bildirdiyinə görə, qəza nəticəsində ona məxsus Toyota Prius ciddi şəkildə zədələnib və avtomobil əvvəlki qaydada istifadə üçün yararsız vəziyyətə düşüb. Onun sözlərinə görə, hadisənin üzərindən vaxt keçməsinə baxmayaraq, dəymiş maddi zərərin aradan qaldırılması təmin edilməyib. Şikayətçi bildirir ki, məqsədi yalnız avtomobilinə dəymiş zərərin ödənilməsi deyil, eyni zamanda hadisənin bütün tərəflərinin şəffaf araşdırılmasıdır.

Şikayətçi: “Maşına 700–800 manat civarında xərc çıxır”

Avtomobil sahibi Fərid İmanov Az24saat.org-a bildirib ki, qəza nəticəsində “Toyota Prius”a dəyən zərərin aradan qaldırılması üçün hazırda təxminən 700–800 manat xərc tələb olunur.

Onun sözlərinə görə, ilkin ustaların verdiyi qiymətlərə əsasən təkcə dəmirçi işi üçün 350–400 manat, rəngsazlıq işləri üçün müxtəlif hesablamalara görə təxminən 140–280 manat, buferin təmiri üçün isə əlavə 150 manat tələb olunur.

Şikayətçi qeyd edir ki, bufer hələ tam sökülmədiyindən arxa hissədə, paneldə və digər konstruktiv detallarda əlavə zədələrin olub-olmadığı dəqiq müəyyən edilməyib. Buna görə də yekun təmir xərcinin daha yüksək çıxması da mümkündür.

Fərid İmanovun sözlərinə görə, hazırkı görünən zədələr əsasında avtomobilin bərpasına ən azı 700–800 manat tələb olunur və bu məbləğ son qiymətləndirmə deyil.

DİN və AYNA-ya müraciət hazırlanır

Az24saat.org-a təqdim olunan məlumatlar və sənədlər əsasında məsələ ilə bağlı Azərbaycan Respublikasının Daxili İşlər Nazirliyinə və Azərbaycan Yerüstü Nəqliyyat Agentliyinə ayrıca müraciətlər hazırlanır. DİN-dən, xüsusilə, yol-nəqliyyat hadisəsinin Bakı Şəhər Dövlət Yol Polisi İdarəsində araşdırılmasının qanuniliyinin, təqdim olunan səs yazısında səsləndirildiyi bildirilən “polisə 300 manat vermişəm” iddiasının və iş üzrə hər hansı qanunsuz müdaxilə olub-olmadığının yoxlanılması istəniləcək. AYNA-dan isə avtomobilin və sürücünün taksi fəaliyyəti üçün qanuni əsaslarının, buraxılış sənədlərinin və “Xan Park”ın fəaliyyətinin araşdırılması tələb olunacaq. Az24saat.org qarşı tərəfin, “Xan Park”ın, Bakı Şəhər Dövlət Yol Polisi İdarəsinin, Daxili İşlər Nazirliyinin və AYNA-nın mövqeyini dərc etməyə hazırdır. Araşdırma davam edir. Şikayətşinin AYNA-ya etdiyi müraciət: Azərbaycan Yerüstü Nəqliyyat Agentliyinə Şikayətşinin DİN-ə etdiyi müraciət: Daxili İşlər Nazirliyinə