Zelenski Rusiyanı hədələdi: Moskva zülmətə qərq olacaq

Prezident Volodimir Zelenskiy, ABŞ-dakı təmaslarını başa vurduqdan sonra Kiyevə gələrək mətbuat nümayəndələrinin suallarını cavablandırıb. Zelenskiy, yaxın aylarda Rusiyanın Ukraynanın enerji infrastrukturuna qarşı ehtimal olunan hücumlarına cavab veriləcəyini vurğulayıb. O deyib: "Əgər Rusiya qışda Ukraynada elektrik kəsilməsinə səbəb olmağı planlaşdırırsa, Ukrayna və tərəfdaşlarının verəcəyi cavabın fərqli olacağına şübhə etmirəm. Rusiya bilməlidir ki, sivilizasiyalı ölkələrlə barbarlar arasındakı fərq odur ki, sivilizasiyalılar ilk hücum edən tərəf olmaz və təcavüzkarlıq göstərməz. Lakin bu, onların zəif olduğu mənasına gəlmir. Əgər Ukraynanın paytaxtını qaranlıqda buraxmaqla hədələyirlərsə, Kreml bilməlidir ki, Rusiyanın paytaxtı da qaranlıqda qalacaq."

Zelenskiy, bu məsələni ABŞ-da, Nyu Yorkda ABŞ prezidenti Donald Tramp ilə keçirdiyi görüşdə də müzakirə etdiyini bildirib.

İsraildən Patriot Sistemi Təhvil Alındı

Prezident Zelenskiy mətbuat nümayəndələrinə, ölkəsinin İsraildən bir Patriot hava hücumundan müdafiə sistemi aldığını və bu sistemin artıq bir aydır ki, Ukrayna səmalarını qoruduğunu açıqlayıb. Ukrayna lideri, "İsraildən alınan Patriot sistemi bir aydır Ukraynada aktivdir. Payızda daha iki Patriot sistemi təhvil alacağıq" deyib, lakin yeni təchizatın haradan gələcəyinə dair ətraflı məlumat verməyib.

Ukraynanın bu satın alması müxtəlif Avropa mətbuat orqanları tərəfindən sürpriz kimi qiymətləndirilib. Çünki Ukrayna bu yaxınlarda Birləşmiş Millətlər Təşkilatında (BMT) İsrailin Fələstin torpaqlarını işğalinin dayandırılmasını tələb edən qətnamə layihəsinə lehinə səs vermişdi.

Macarıstanın Təhlükəli Hərəkətləri

Zelenskiy çıxışında həmçinin, Macarıstana aid pilotsuz uçuş aparatının (PUA) dünən Ukrayna hava məkanını pozduğu iddiasına toxunub. Ukrayna lideri, "Məncə, onlar çox təhlükəli işlər görürlər. Ən əsası da özləri üçün çox təhlükəli olan işlər" ifadələrini işlədib.

Macarıstanın Xarici İşlər və Ticarət naziri Peter Siyarto isə dünən sosial media hesabından verdiyi açıqlamada olayı təkzib edərək, "Prezident Zelenskiy, Macarıstana qarşı obsesiyası səbəbindən ağlını itirir. İndi də həqiqətdə olmayan şeyləri görməyə başlayıb" demişdi.

24 saat