2019-dan sonra Suriyada 62-ci Beynəlxalq Şam Sərgisi açıldı

Quran-i Kərim tilavəti ilə başlayan tədbirdə Prezident Əhməd Şara, Türkiyənin Ticarət naziri Ömər Bolat və Səudiyyə Ərəbistanı İnvestisiya nazirinin müavini Abdullah Əl-Dubeyhi açılış nitqləri ilə çıxış ediblər. Prezident Şara çıxışında Şamın dünya paytaxtları arasında müstəsna yerə malik olduğunu vurğulayaraq, Suriya xalqının ticarət və sənaye sahəsində zəngin təcrübəyə sahib olduğunu bildirib. Şara qeyd edib ki, Suriya keçmişdə zülmkar və despot bir rejimin hökmranlığı altında, tarixinə yad bir dövr keçirib. "Bu müddətdə xalqın ruhu dəyişdi, əzmkarlıq zəiflədi, investorlar ölkədən qaçdı. Suriya öz iqtisadi cəlbediciliyini itirdi və xalqı onu tərk etdi," deyə o, Suriya iqtisadiyyatının düşdüyü vəziyyəti təsvir edib. Prezident Şara bildirib ki, bu qaranlıq dövr Suriya xalqının qələbəsi və keçmiş rejimin süqutu ilə başa çatıb. "Bu gün Suriyaya onu sevənlər, xalqı, qəhrəmanları və keçmişinin varisləri geri döndü. Hamısı birlikdə ölkəni yenidən qurmaq, qırılmış əlaqələri bərpa etmək üçün gəliblər," deyə vurğulayıb. 8 dekabr 2024-cü ildə Baas rejiminin süqutundan bəri yeni Suriyanın prioritetinin təhlükəsizlik sabitliyi və Suriya iqtisadiyyatının inkişafı olduğunun altından xətt çəkən Şara, kənd təsərrüfatı və sənaye istehsalının artırılması planlarının hazırlandığını, miqrantların və qaçqınların geri dönüşünün hədəfləndiyini, elektrik, su və səhiyyə kimi əsas infrastruktur xidmətlərinin tədricən yaxşılaşdırılmağa başlandığını dilə gətirib. Suriya diplomatiyasının səylərinin də nəzərdən qaçırılmayacağını, dünya ilə münasibətlərin bərpa olunması prosesinin başladığına işarə edən Şara, "Suriya özünə tətbiq olunan sanksiyalardan və təzyiqlərdən qurtulmağa başladı. Xaricdəki suriyalılar bilik, təcrübə, resurs və bacarıqları ilə ölkələrinə qayıdaraq inkişafa töhfə verirlər," deyə bildirib. Şara sözlərinə əlavə edib: "Bu gün dünyanın ən qədim yaşayış məskəni olan Şamda, bölgənin ilk və unikal sərgi sahəsində toplaşaraq, köklü iqtisadi tariximizə aid bir mirası yenidən canlandırırıq və Şam Beynəlxalq Sərgisi ilə parlaq bir gələcəyə birlikdə addım atırıq."

Şam Beynəlxalq Sərgisi yeni Suriya üçün böyük uğurdur

Türkiyənin Ticarət naziri Ömər Bolat isə Türkiyə Prezidenti Rəcəb Tayyib Ərdoğanın Suriya Prezidenti Əhməd Şaraya, Suriya xalqına və sərgi iştirakçılarına salamlarını çatdırdığını deyib. Şam Beynəlxalq Sərgisinin yeni Suriya üçün böyük bir uğur olduğunu vurğulayan Bolat, Türkiyənin Suriya ilə ən uzun quru sərhədinə malik ölkə olduğunu və iki ölkə arasında güclü qohumluq əlaqələrinin mövcudluğunu qeyd edib. Nazir Bolat, yeni dövrdə Suriyanın müdafiə, Suriya iqtisadiyyatı və diplomatiya sahələrində keçmişə nisbətən daha güclü bir quruluşa qovuşacağına inandığının altını çəkib. Sərgidə iştirakından məmnunluğunu ifadə edən Bolat, tədbirə 500-dən çox türk iş adamının qatıldığını qeyd edib.

Suriya iqtisadiyyatı inkişaf etsə, Səudiyyə Ərəbistanı da inkişaf edər

Səudiyyə Ərəbistanı İnvestisiya nazirinin müavini Abdullah Əl-Dubeyhi də "Biz bir-birimizə bənzəyirik" şüarı ilə hərəkət etdiklərini bildirərək, "Suriya inkişaf etsə, Səudiyyə Ərəbistanı da inkişaf edər," deyə vurğulayıb. Əsasən enerji sektoru olmaqla bir çox sahədə yaxın zamanda müqavilələrin imzalanacağını qeyd edən Dubeyhi, "Bugünkü iştirakımız 24 milyard Səudiyyə riyalı dəyərindəki iqtisadi razılaşmaların davamıdır," ifadəsini işlədib. 5 sentyabra qədər davam edəcək Şam Beynəlxalq Sərgisinə 25 ölkədən 1000-dən çox şirkət qatılır. Qeyd edək ki, 61-ci Şam Beynəlxalq Sərgisi 2019-cu ildə təşkil edilmişdi.

24 saat