9 ay şərti cəza, 110 min avro təzminat

Korrupsiya İşində Hökm: Almaniyalı Keçmiş Deputat Cəzalandırıldı

Avropa Şurası və Almaniya Bundestaqında Azərbaycanla əlaqəli korrupsiya işi üzrə mühüm hökm çıxarılıb. Avropa Şurası Parlament Assambleyasının (AŞPA) Almaniyadan olan üzvü Frank Şvabe bu qərarı "narahatedici, eyni zamanda nikbin" adlandırıb. O, öz sosial media hesabında qeyd edib ki, bu, siyasi korrupsiyanın Almaniyada təqib olunub cəzalandırıldığını açıq şəkildə göstərir. Şvabenin sözlərinə görə, Eduard Lintner Azərbaycanın maliyyələşdirdiyi deputatların təsir və korrupsiya sistemini qurub və artıq buna görə cəzalandırılıb.

Keçmiş Deputatlara Qarşı İttihamlar

Münhen prokurorluğu 2024-cü ilin yanvarında Bundestaqın iki keçmiş deputatına qarşı korrupsiya ittihamları irəli sürmüşdü. Onlar Avropa Şurasında "Azərbaycan qalmaqalı" kimi tanınan işin əsas fiqurları hesab olunurdular. Bavariya paytaxtının prokurorluğu Xristian-Sosial İttifaqından (CSU) Eduard Lintneri və Xristian-Demokrat İttifaqından (CDU) Aksel Fişeri "mandat sahiblərinin pulla ələ alınması"nda günahlandırırdı.

Lintnerin Cəzası və Digər Hallar

Münhen məhkəməsi Baş Prokurorluğun Eduard Lintnerin seçilmiş vəzifəli şəxslərə rüşvət verməsində günahkar olmasına dair arqumentlərini təsdiqləyərək, onu 9 ay şərti azadlıqdan məhrum etmə cəzasına məhkum edib. "Die Zeit" nəşrinin verdiyi məlumata görə, müdafiə tərəfinin bəraət almaq cəhdləri uğursuzluqla nəticələnib. Bundestağın sabiq CDU üzvü Aksel Fişer barəsindəki məhkəmə işinin isə ayrıca icraata ayrıldığı bildirilir. Məhkəmə həmçinin vəfat etmiş deputat Karin Strenzə Azərbaycandan ən azı 111 min avro vəsait çatdırıldığı qənaətinə gəlib; bu məbləği onun həyat yoldaşı ödəməlidir.

"Azərbaycanlı Çirkli Pul Yuvası" İddiaları

Frank Şvabenin qeydlərinə görə, verilmiş hökm deputatlara Azərbaycan tərəfindən sistemli şəkildə rüşvət verildiyini, korrupsiyanın genişmiqyaslı şəkildə planlaşdırılaraq təşkil olunduğunu göstərir. Beynəlxalq Jurnalistlərin Araşdırmalar Mərkəzi (OCCRP) tərəfindən 2017-ci ildə yayılan araşdırmada 2,9 milyard dolların Azərbaycandan qanunsuz yolla çıxarılaraq Avropalı rəsmilərə rüşvət vermək üçün istifadə olunduğu iddia edilmişdi. "Azerbaijani Laundromat" ("Azərbaycanlı Çirkli Pul Yuvası") kimi tanınan bu araşdırma, Eduard Lintnerin bu sxem çərçivəsində 1,1 milyon dollar aldığını ortaya çıxarmışdı. Lintner isə bu vəsaiti Azərbaycan-Almaniya münasibətlərini inkişaf etdirən bir cəmiyyət üçün aldığını bəyan etmişdi. Azərbaycan rəsmiləri OCCRP-nin araşdırmasını qərəzli və əsassız hesab edərək, onun erməni lobbisi və Azərbaycanın uğurlarını qısqanan qüvvələrin sifarişi ilə hazırlandığını bildirmişdilər.

24 saat