AB: Qəzza gələcək Fələstin dövlətinin ayrılmaz hissəsi

Aİ sözçüsündən Qəzza ilə bağlı açıqlama

Brüsseldə keçirilən gündəlik mətbuat konfransında sözçü Hipper, jurnalistlərin bölgədəki vəziyyətlə bağlı suallarını cavablandırıb. İsrailin baş naziri Netanyahunun bütün Qəzza zolağını işğal etmək niyyətində olduğu barədə yayılan xəbərlərə toxunan Hipper, mövqelərinin birmənalı olduğunu bildirib: "Qəzza gələcək Fələstin dövlətinin ayrılmaz tərkib hissəsi olmalıdır."

Atəşkəs çağırışı və Həmasın rolu

Hipper, əsirlərin azad edilməsi və Qəzzada davamlı atəşkəsin təmin olunması üçün çağırış edib. O, Həmasın Qəzzanın gələcək idarəçiliyində və təhlükəsizliyində heç bir rol oynamamalı olduğunu vurğulayıb.

Humanitar vəziyyət və təcili yardım tələbi

Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Kaja Kallasın bölgədə aclığın hökm sürdüyünə inanıb-inanmadığı sualına cavab olaraq Hipper, Kallasın buradakı ölümlər, fəlakətlər və dözülməz görüntülər barədə açıq və qətiyyətli şəkildə danışdığını qeyd edib. Hipper əlavə edib ki, Kallasın səyləri tərəfdaşları ilə əlaqə quraraq bölgəyə təcili və dərhal humanitar yardım çatdırılmasını təmin etməyə yönəlib.

Qəzzada böhranın miqyası

İsrailin hücumları və bölgəyə yardımların girişini məhdudlaşdıran sıx blokadası altında olan Qəzza zolağında aclıq, su, dərman, tibbi ləvazimat və gigiyena materialları çatışmazlığı kimi ciddi humanitar böhran yaşanır. 2023-cü il oktyabrın 7-dən bəri bu ərazidə aclıqdan 94-ü uşaq olmaqla 188 nəfər həyatını itirib.

24 saat