Ağ Evdə tarixi Tramp-Şara görüşü: Sezar sanksiyaları dayandırıldı

Ağ Evdə Tarixi Görüş: Tramp və Şara Bir Araya Gəldi, Sezar Sanksiyaları Dayandırıldı

ABŞ prezidenti Donald Tramp ilə Suriya prezidenti Şara arasında Ağ Evdə reallaşan görüş 1,5 saat davam etdi. Görüşlə bağlı Ağ Evdən hələ ki, rəsmi bir bəyanat verilməyib. Qeyd olunur ki, danışıqlar zamanı Suriyaya qarşı tətbiq edilən sanksiyaların ləğvindən tutmuş regional məsələlərə qədər bir çox mövzu müzakirə edilib. Suriya prezidenti Şara, Ağ Evdən çıxarkən, onu gözləyən suriyalıları avtomobilindən enərək salamlayıb.

Şaranın Trampla bu görüşü, Suriya dövlət başçısının Ağ Evdə bir ABŞ prezidenti ilə keçirdiyi ilk görüş kimi tarixə düşdü.

'Sezar Qanunu Sanksiyaları' Dayandırıldı

ABŞ Xəzinə Nazirliyi, Suriyaya qarşı tətbiq edilən Sezar Qanunu sanksiyaları ("Suriya Sezar Mülki Müdafiə Qanunu") çərçivəsindəki məhdudiyyətlərin 180 günlük müddətə qismən dayandırıldığını bəyan edib.

ABŞ Xəzinə Nazirliyindən verilən yazılı açıqlamada, 10 noyabr tarixində yenilənən Suriya sanksiyaları bölməsinə dair ictimaiyyətlə məlumat paylaşılıb.

Açıqlamada qeyd olunub: "Dövlət katibi, 10 noyabr tarixində, Suriyaya qarşı sanksiyaların yumşaldılması öhdəliyimizi vurğulamaq məqsədilə Sezar Qanunu sanksiyalarının tətbiqini 180 günlük müddətə qismən dayandırıb."

Bildirilir ki, bu qərar, 23 may tarixində verilmiş 180 günlük Sezar Qanunu sanksiyalarının dayandırılması qərarını əvəz edib.

Açıqlamada, Rusiya və İranla bağlı əməliyyatların, eləcə də bu ölkələrdən gələn malların, texnologiyaların, proqram təminatının, vəsaitlərin, maliyyələşmənin və ya xidmətlərin transferinin bu müvəqqəti azadolmalardan istisna edildiyi vurğulanıb.

Rəsmi Qarşılama Mərasimi Olmadı

Mətbuata qapalı keçirilən görüş, yerli vaxtla saat 11:37-də başlayıb. Şara, jurnalistlərin yerləşdiyi Qərb Qanadının əsas qapısı əvəzinə, media nümayəndələrinin görə bilmədiyi yan girişdən Ağ Evə daxil olub. Onun üçün rəsmi qarşılama mərasimi təşkil edilməyib.

Şaranın Diplomatik Səfərləri İntensiv idi

Suriyada Bəşər Əsəd rəhbərliyini 8 dekabrda devirdikdən sonra hakimiyyəti ələ alan Əhməd Şara, bu günə qədər bir sıra xarici səfərlər həyata keçirib. Şaranın ilk səfərlərindən biri, Türkiyə prezidenti Rəcəb Tayyib Ərdoğanın dəvəti ilə 4 fevralda Ankaraya olub.

Şara, may ayında Fransaya gedərək, prezident Emmanuel Makron ilə görüşüb.

ABŞ prezidenti Donald Tramp 14 may günü Riyadda Səudiyyə Ərəbistanının Vəliəhd Şahzadəsi Məhəmməd bin Salmanın müşayiəti ilə Şara ilə görüşüb. Prezident Ərdoğan da telekonfrans vasitəsilə iclasa qatılıb. Tramp, bir gün əvvəl Suriyaya qarşı sanksiyaları ləğv etdiyini açıqlamış və bu prosesdə Prezident Ərdoğan və Səudiyyə Vəliəhd Şahzadəsi Salman ilə apardığı danışıqların effektiv olduğunu bildirmişdi.

Şara, sentyabr ayında Nyu-Yorkda BMT Baş Assambleyasında iştirak edib və 58 il sonra burada çıxış edən ilk Suriya lideri olub. O, həmin tədbirdə Trampla da görüşüb.

Suriya lideri, 15 oktyabrda Moskvada Rusiya Prezidenti Vladimir Putin ilə bir araya gəlib.

24 saat