Antalya yox, Bodrum yox: Ruslar Şimali Koreyaya üz tutdu

Yeni Turizm İstiqaməti: Şimali Koreya

Rusiyalı turistlər tətil mövsümünə start veriblər. Lakin artan qiymətlər və Ukraynadakı müharibənin davam etməsi Rusiya vətəndaşlarını yeni alternativlər axtarmağa sövq edib. Əvvəllər Türkiyənin Antalya və ya Bolqarıstanın Varna şəhərlərinə axın edən ruslar indi üzlərini Şimali Koreyaya tutublar.

Şimali Koreya lideri Kim Çen Inın illərdir nümayiş etdirmək istədiyi Vonsan Kalma çimərliyi və su parkı bir neçə həftə əvvəl ilk dəfə xarici turistlər üçün açılıb. Maraqlıdır ki, bura gələnlərin arasında yalnız Rusiyalı turistlər olub. Geniş qumsalları və möhtəşəm otelləri ilə inşa edilmiş bu nəhəng kompleksə sadəcə Rusiya vətəndaşları qəbul edilib.

Lüks Hiss, Boş Sahillər

Moskvadan gələn 13 nəfərlik ilk qrupa daxil olan Anastasiya Samsonova "Wall Street Journal"a Şimali Koreya tətilini danışıb. Samsonova çimərliyə ilk addım atanda qəribə mənzərə ilə qarşılaşdığını bildirib: “Bütün sahil bomboş idi. Elə bilirdik ki, kompleksdə yalnız biz varıq” deyib.

Boş Şimali Koreya sahillərində xidmətdə heç bir çatışmazlıq hiss olunmayıb. Samsonova sifariş etdikləri hər şeyin dərhal gəldiyini və özlərini “dünyanın ən vacib insanları” kimi hiss etdiklərini söyləyib. Samsonovaya bu qədər təsir edən Vonsan Kalma kompleksi Şimali Koreya lideri Kim Çen Inın şəxsi layihələrindən biridir. Kompleks 2018-ci ildə tamamlanıb. Kim Çen In layihənin planlarını minlərlə eskiz arasından özü seçib. Dəniz kənarındakı bu kompleksin otellər, kazinolar, ticarət mərkəzləri kimi elementləri ilə Benidormdan ilhamlandığı məlumdur.

Lakin kompleksin böyük bir hissəsi hələ də tamamlanmayıb. İyunun sonunda keçirilən açılış mərasimində Kim siqareti əlində su sürüşkəninin yanında oturub və sürüşkəndən sürüşən vətəndaşlarını izləyib. Daha sonra gənc qızı ilə birlikdə sahildə gəzintiyə çıxıb. Elə həmin həftə Rusiyanın xarici işlər naziri Sergey Lavrov da Vonsana gələrək Kim ilə lüks yaxtasında görüşüb.

Bahalı Macəra, Gözlənilməz Sürprizlər

Kommunist ölkədəki tətilin maliyyəti kifayət qədər yüksək olub. Rusiyalı turistlər Şimali Koreyaya 1400 dollar, Rusiya turizm agentliyinə isə 35 min rubl ödəyiblər. Ümumilikdə, tətilçilər hər nəfər üçün 75 min TL xərc çəkiblər. Turun üç günü paytaxt Pxenyanqda keçdikdən sonra turistlərin Vonsana getməsi planlaşdırılıb. Lakin Lavrovun gəlişi səbəbindən uçuş ləğv edilərək 10 saatlıq qatar səyahəti məcburi hala gətirilib.

Buna baxmayaraq, turistlər yolboyu kəndləri və mənzərəni maraqla izləyiblər. Vonsana çatdıqlarında yerli əhalidən ayrı, xüsusi çimərliklərə aparılıblar. Lakin Kim Çen Inın göz bəbəyi olan su parkına daxil olmaq qadağan edilib. Turistlər yalnız avtomatik ödəniş bilərzikləri ilə alış-veriş edə biliblər, Rusiya rublu qəbul edilməyib.

Jet ski və ATV qiyməti soruşulduqda, əməkdaş qiymət müəyyən edə bilmədiyi üçün istifadə pulsuz olub. Kompleksdə bəzi problemlər də yaşanıb. Otel əməkdaşları “Narahat etməyin” yazısına baxmayaraq otaqlara girməyə davam ediblər. Turistlər özlərini “daim izlənilmiş” hiss etdiklərini bildiriblər. Bir an hamısına mayo və eynək paylanılıb. Dənizə topluca giriblər, tur bələdçisi də onlara qoşulub. Bələdçi üzməyi bilmədiyi üçün saatlarla bir Rusiyalı turistlərdən birinə tutunmaq məcburiyyətində qalıb. Buna baxmayaraq, təşkilatın sonunda Şimali Koreya rəhbərliyi uçuşun ləğvi səbəbindən hər turistə 200 dollar nağd pul geri qaytarıb.

24 saat