Arda Turan rəqib komandanın ehtiyat oyunçular skamyasına getdi

Ukrayna Premyer Liqasının 14-cü turunda lider Şaxtyor Donetsk öz meydanında Krıvbası qəbul edib. Qarşılaşma 2-2 hesablı bərabərliklə başa çatıb.

Oyunun ikinci hissəsində baş verən hadisə matça kölgə salıb. Arda Turan rəqib komandanın texniki heyəti ilə mübahisə edib. 47-ci dəqiqədə rəqib komandanın ehtiyat oyunçular skamyasına qədər gedən Arda Turan yaşanan mübahisədən sonra sarı vərəqə ilə cəzalandırılıb. Turanın olduqca əsəbi olduğu müşahidə olunub.

Arda Turan qarşılaşmadan sonra baş verən hadisə ilə bağlı açıqlama verib: "Bu gün gördüyünüz o sözlü mübahisəyə gəlincə, hisslərin yüksəldiyini anlayıram, lakin aşılmaması lazım olan bəzi qırmızı xətlər vardır. Ailə və ya yaxınlarla bağlı deyilən sözlərin hər vəziyyətdə yersiz olduğunu düşünürəm. Belə şeylərə heç bir halda əl atılmamalıdır. Buna görə də, bəli, bəlkə reaksiyam bir az şişirdilmiş ola bilər, ancaq oxşar vəziyyətlərdə reaksiya göstərməyim çox sərt olsa belə, bundan əsla peşmanlıq duymam."

Ukrayna mətbuatında yer alan xəbərə görə, Arda Turan bu mövsüm liqada 4-cü sarı vərəqəsini alıb və bir matçlıq cəza alıb. Arda Turan, Şaxtyor Donetskin Kolos ilə oynayacağı matçda iştirak edə bilməyəcək.

24 saat