Avropa İttifaqında yeni mərhələ: Otel və restoranlarda sərt qadağalar tətbiq olunur

Avropa İttifaqında yeni dövr: Otel və restoranlarda ciddi qadağalar başlayır

Avropa İttifaqı (Aİ) ətraf mühitin mühafizəsi və tullantıların miqdarının azaldılması məqsədilə qablaşdırma qaydalarında əsaslı dəyişikliklər tətbiq edib. Avqustun 12-dən qüvvəyə minən yeni tənzimləmə istehsalçılar üçün bir sıra vacib öhdəliklər müəyyən edir.

Qəbul olunmuş qərara əsasən, qəhvə kapsulları bundan sonra qablaşdırma tullantısı hesab ediləcək. Bu məhsulların təkrar emalı ilə bağlı yaranan xərclər isə birbaşa istehsalçı şirkətlərin üzərinə düşəcək.

Dəyişikliklərin ən çox diqqət çəkən məqamı otel və restoran sektorunu əhatə edir. 2030-cu ildən etibarən otellərdə qonaqlara təqdim olunan mini şampunlar, duş gelləri və digər kosmetik vasitələrin kiçik qablaşdırmalarda verilməsi qadağan ediləcək.

Bununla yanaşı, restoran və kafelərdə geniş istifadə olunan təkdozluq sous, şəkər və ədviyyat paketlərinin istifadəsinə də son qoyulacaq. Bu tədbir Avropada plastik tullantıların həcminin əhəmiyyətli dərəcədə azaldılmasına xidmət edir.

Ekspertlər hesab edirlər ki, bu qadağalar həm qablaşdırma sənayesini, həm də turizm sektorunu kökündən dəyişəcək. İstehsalçılar və müəssisələr üçün nəzərdə tutulan keçid dövrü 2030-cu ildə yekunlaşacaq.