Bu yay iqlim dəyişikliyinin təsirinə məruz qalan Avropanın bəzi bölgələrində həddindən artıq istilər müşahidə olunmuş və temperatur rekordları qeydə alınmışdır. Cənub-qərbi Fransa, Xorvatiya, İtaliya və İspaniyada görünməmiş istilər insanları və ətraf mühiti əhatə edərkən, Avropa boyunca meşə yanğınlarının vurduğu ziyanın 87 faiz artdığı bildirilir. Bu cür istilər Avropa miqyasında rekordlar qıraraq daha böyük və güclü meşə yanğınlarına səbəb olur.
Fransada Termometr 40 Dərəcəni Keçdi
Fransanın cənub-qərbində bazar ertəsi günü hava proqnozu stansiyalarının 40 faizində termometrlər 40 dərəcədən yuxarı temperaturu göstərmişdir. Bu göstərici mövsüm normalarından 12 dərəcə yuxarı olmaqla yeni bir rekordun qeydə alınmasına səbəb olmuşdur. Qeyd olunur ki, Fransada 1947-ci ildən bəri yaşanan 51 isti hava dalğasının yarıdan çoxu son 15 ildə müşahidə edilmişdir. Xorvatiyanın Şibenik şəhərində 39.5 dərəcə ilə rekord qırılarkən, Balkanlarda geniş miqyaslı meşə yanğınları başlamışdır. Macarıstan isə bir gün əvvəl Körösladanydə 39.9 dərəcə ilə öz rekordunu yeniləmişdi. Şimali Avropada, yəni Skandinaviya ölkələrində də 30 dərəcədən yuxarı temperaturların qeydə alınması təəccüblə qarşılanmışdır.
İtaliyada “Qırmızı Həyəcan”
İtaliyanın 27 böyük şəhərindən 16-da temperaturla bağlı “qırmızı həyəcan” siqnalı verilmiş, İspaniyada isə isti vurmasından bir uşağın həyatını itirməsi həyəcan təbili çalmışdır. Avropanı bürüyən bu istilər bitki örtüyünü qurudaraq, elm adamlarının iqlim dəyişikliyi şərtlərini “molotov kokteyli” olaraq təsvir etdiyi meşə yanğınlarının daha da yayılmasına səbəb olmuşdur. Yüksək temperaturlar Avropada hər il minlərlə insanın ölümünə yol açır. Tədqiqatçılar, əsrin sonunadək Avropada təhlükəli istilər səbəbindən hər il əlavə 8 min ilə 80 min arasında insanın həyatını itirəcəyini proqnozlaşdırırlar.
Səbəb: İqlim Dəyişikliyi
Avropanın cənubunda müşahidə olunan qızmar temperaturlar, elm adamlarının iqlim dəyişikliyinin nəticəsi olaraq dəyərləndirdiyi şiddətli isti hava dalğalarını bir daha gözlər önünə sərir. Avropa Birliyinin İqlim Müşahidə Təşkilatı "Kopernik" (Copernicus) Avropanın dünyanın ən sürətlə isinən qitəsi olduğunu bildirir. Avropada isti hava dalğası hadisələrinin daha tez-tez yaşandığı elmi təşkilatlar tərəfindən qəbul edilir. "Kopernik"ə görə, iqlim dəyişikliyi isti hava dalğalarının tezliyinin və şiddətinin artmasına səbəb olur. Avropa və Aralıq dənizi hövzəsinin yarıdan çoxu (52 faiz) iyul ayında ardıcıl dördüncü ay quraqlıq yaşamışdır. Bölgədəki quraqlıq səviyyələri iyul ayında ən yüksək həddə çataraq, 2012-2024-cü illər orta göstəricisini 21 faiz ötmüşdür.
İstanbul üçün Rütubət Xəbərdarlığı
Kandilli Rəsədxanası Meteorologiya Laboratoriyasının meteorologiya mühəndisi Adil Tək, İstanbulda rütubətin təsirinin daha çox hiss ediləcəyini bildirmişdir. O qeyd etmişdir ki, İstanbulda temperaturun yüksəlməsinə şimaldan əsən, yəni şimal-şərq küləyi mane olur. Bu külək eyni zamanda Qara dənizin rütubətini İstanbul üzərinə daşıyır. Hazırda İstanbulda temperaturlar 29 dərəcə civarında olsa da, cənub rayonlarında 31-32 dərəcəyə qədər yüksələ bilər. Lakin İstanbulda şimal-şərq küləyinin rütubət dəyərlərini artırması, sözsüz ki, boğucu təsirini daha da gücləndirir.
Oxucu Şərhləri
Şərh Yaz