Azgəlirlilərə "vətəndaşlıq maaşı": gerisayım başladı

Hökumətin azgəlirli ailələrə dəstək planı: Gəlir Tamamlayıcı Ailə Dəstək Sistemi işə düşür

Türkiyə hökumətinin minimum əməkhaqqından aşağı gəlirə malik ailələrə dəstək ödəməsi planı iqtisadçı Prof. Dr. Abdulkadir Develi tərəfindən dəyərləndirilib. Develi "Müəyyən edilmiş rəqəmdən az gəlir əldə edən ailələrə dəstək ödəməsi düşünülür" deyib və əlavə edib: "Buradakı bu sistemə biz Gəlir Tamamlayıcı Ailə Dəstək Sistemi adını verə bilərik." Türkiyə hökumətinin gəliri az olan vətəndaşlara dəstək məqsədilə 2026-cı ildə Vətəndaşlıq maaşı tətbiqinə keçmək üçün işlərə başladığı bildirilir. Əldə edilən məlumatlara görə, bu təşəbbüslə gəliri minimum əməkhaqqından az olan ailələrə Vətəndaşlıq maaşı vasitəsilə maliyyə dəstəyi veriləcək. İqtisadçı Prof. Dr. Abdulkadir Develi bu layihənin detallarını açıqlayıb.

Gəlir Tamamlayıcı Ailə Dəstək Sistemi

Prof. Dr. Develi təklif olunan sistemi "müəyyən edilmiş rəqəmdən az gəlir əldə edən ailələrin dəstəklənməsi" kimi təsvir edib. O, misal gətirərək bildirib: "Tutaq ki, 25 min lirəlik gəlir həddi müəyyən edilmişdir. Əgər bir ailəyə 20 min lirə gəlir daxil olursa, yerdə qalan 5 min lirənin dövlət tərəfindən verilməsi və ailənin bu şəkildə subsidiyalaşdırılması əsas motivasiyadır. Buradakı bu sistemə biz Gəlir Tamamlayıcı Ailə Dəstək Sistemi adını verə bilərik." Bu tətbiqin Orta Müddətli Proqramda (OMP) da yer aldığını qeyd edən Develi, "Bu tətbiqi xüsusilə ailəyönümlü, əhatəli və işçi qüvvəsinin iştirakına mane olmayan sosial yardım proqramları çərçivəsində dəyərləndirmək daha doğru olar" deyib. İqtisadçı həmçinin vurğulayıb ki, ailənin rifah səviyyəsini qoruyarkən, məşğulluğun da zərər görməməsi və insanları işə təşviq etmək əsas hədəflərdəndir.

Tək yaşayan vətəndaşlar da faydalana bilər

Develi bu layihənin detallarının gələcəkdə açıqlanacağını, dəstək məbləği, faydalanacaq şəxslərin sayı kimi məhdudiyyətlərin yaxın zamanda müəyyən olacağını gözlədiyini bildirib. İqtisadçı qeyd edib ki, əsas prioritet ailənin rifah səviyyəsini və ev təsərrüfatlarını dəstəkləmək olsa da, fərdi şəxslər üçün də tətbiqlər ola bilər. "Yalnız yaşayan vətəndaşlar da ola bilər," deyən Develi, "Burada 'vətəndaş' kəlməsi önəmlidir. Tək yaşayan vətəndaşlar da bu dəstəkdən faydalanacaqlar," ifadələrini işlədib.

Tətbiqdə yaş həddi varmı?

Bu tətbiqlə bağlı hər hansı müddət məhdudiyyəti qeyd edilmədiyini bildirən Develi, "Ailənin gəliri artdığı zaman bu Vətəndaşlıq maaşı avtomatik olaraq dayandırılacaq," deyə vurğulayıb. İqtisadçı yaş faktorunun tətbiqə təsir etməyəcəyini və proqramın hər bir vətəndaşı əhatə edəcəyini qeyd edib. "Təqaüdçülərin də gəliri artacaqmı?" sualına cavab olaraq Develi, "Mən bunu minimum əməkhaqqı səviyyəsindən aşağı maaş alan hər kəsi əhatə edəcək şəkildə yozuram," deyib. Develi, bu proqramın 2026-cı ildə seçilən pilot şəhərlərdə tətbiqinə başlanacağını ifadə edib.

24 saat