Bakıdan Tramp marşrutuna şərtli yaşıl işıq

Rusiyanın “Tramp marşrutu”na Dəstək və Ehtiyatlı Mövqeyi

Vaşinqtonda ABŞ, Azərbaycan və Ermənistan arasında razılaşdırılan Tramp marşrutuna dair bəyannamə Moskvada geniş rezonans doğurub. Rusiya baş nazirinin müavini Aleksey Overçuk avqustun 8-də bildirib ki, ölkəsi bu təşəbbüsü dəstəkləyir.

Overçuk qeyd edib ki, Ermənistan Moskvanın strateji müttəfiqidir və əgər İrəvan bu marşrutu özü üçün faydalı hesab edirsə, Kreml bunu dəstəkləyir. Lakin o, tərəflərlə "aydınlaşdırılmalı olan bəzi nüanslar"ın mövcudluğunu da vurğulayıb. Regional kommunikasiyaların bərpası ilə bağlı Rusiyanın mövqeyi tamamilə şəffafdır.

Rusiya Xarici İşlər Nazirliyinin sözçüsü Mariya Zaxarovanın Vaşinqton görüşü ilə bağlı şərhi daha ehtiyatlı olub. O, Ermənistanın İranla sərhədinin hələ də Rusiya sərhədçiləri tərəfindən qorunduğunu xatırladıb. Zaxarova bildirib ki, Vaşinqtonun regional kommunikasiya xətlərinin bərpasına dair açıqlamaları diqqətlə qiymətləndiriləcək. O, üçtərəfli razılaşmaların qüvvədə qaldığını, çünki heç bir tərəfin rəsmi olaraq geri çəkilmədiyini vurğulayıb. Eyni zamanda, Ermənistanın Avrasiya İqtisadi İttifaqının vahid gömrük məkanında iştirakını, xüsusilə də respublika ərazisindən keçən tranzit əməliyyatlarının tənzimlənməsi baxımından nəzərə almağın vacibliyini qeyd edib.

Avqustun 8-də Vaşinqtonda ABŞ, Azərbaycan və Ermənistan liderlərinin imzaladığı birgə bəyannamədə Azərbaycanı Naxçıvanla birləşdirəcək “Beynəlxalq Sülh və Rifah naminə Tramp Marşrutu” (TRIPP) adlı layihəyə toxunulub. Sənədin dördüncü maddəsində qeyd olunur ki, Ermənistan öz ərazisində bu əlaqə layihəsi üçün çərçivənin müəyyən edilməsi məqsədilə ABŞ və qarşılıqlı müəyyən edilmiş üçüncü tərəflərlə əməkdaşlıq edəcək. Bəyannamədə bu məqsədə ən qısa zamanda nail olmaq üçün xoş niyyətlə səy göstərilməsinə dair qətiyyət təsdiqlənib. ABŞ prezidenti Donald Tramp isə birgə mətbuat konfransında Ermənistanın marşrutu 99 illiyə ABŞ-yə icarəyə verməyə razılaşdığını açıqlayıb.

24 saat