BM-dən Qəzzaya təcili tədbir çağırışı

UNISPAL rəsmi internet saytı vasitəsilə yaydığı yazılı bəyanatda Qəzzada yarım milyondan çox insanın aclıq və ölümlə üz-üzə qaldığını vurğulayıb. Bəyanatda “Qəzza Qıtlığı” adlandırılan vəziyyətin getdikcə pisləşdiyi qeyd olunub. Bildirilib ki, bu, İsrailin iki ildir bölgəni demək olar ki, tamamilə məhv etməsi və blokadaya alması, ərzaq istehsal imkanları və digər bütün dolanışıq mənbələri də daxil olmaqla mülki infrastrukturu dağıdan amansız hərbi hücumları nəticəsində yaranmış insan faciəsidir. UNISPAL işğalçı İsrailin Fələstin xalqına qarşı qəsdən tətbiq etdiyi bu məhrumiyyəti və aclığı sərt şəkildə qınadığını ifadə edib. Açıqlamada qeyd edilib ki, "Bu, beynəlxalq hüququn ciddi pozuntusudur. Dövlətlər bu fəlakətə və qeyri-qanuni duruma bütövlükdə sürətlə son qoymaq üçün qanuni öhdəliklərini yerinə yetirmək məqsədilə təcili hərəkətə keçməlidirlər.” çağırışı edilib.

Qəsdən Yaradılmış Fəlakət

Bəyanatda bölgədəki böhranın “qəsdən yaradılmış bir fəlakət” olduğu vurğulanıb. “İnfrastruktur dağıdılıb, yardımlar əngəllənir və ya manipulyasiya edilir, uşaqlar müalicəvi qida və zənginləşdirilmiş süddən məhrum buraxılır,” – ifadələri yer alıb.

UNISPAL dərhal və daimi atəşkəsin təmin edilməsini, həmçinin Qəzzanın bütün bölgələrinə tam və maneəsiz humanitar yardım çatdırılması üçün beynəlxalq resursların sürətlə səfərbər olunmasını tələb edib. Açıqlamada yardımları əngəlləyən və mülki əhalini hədəf alan məsuliyyət daşıyan şəxslərin də hesabat verməsi vacibliyi vurğulanıb.

Bəyanatda qeyd olunub ki, “Fəaliyyətsiz keçən hər gün Fələstin xalqının əzablarını və sağ qalma mübarizəsini dərinləşdirir, bu bölgəni daha böyük fəlakətə sürükləyən bir terror günüdür. Fəaliyyətsizliyə heç bir əsas yoxdur. Beynəlxalq cəmiyyətin müdaxilə etmək üçün qanuni və əxlaqi öhdəliyi var. Bir xalqın qəsdən humanitar vəziyyətə məruz qoyulması dərhal dayandırılmalı olan bir cinayətdir.”

BMT-nin dəstəklədiyi İnteqrasiya edilmiş Qida Təhlükəsizliyi Faza Təsnifatı (IPC) tərəfindən yayımlanan son hesabatda, 15 avqust 2025-ci il tarixinə Qəzza şəhərindəki qıtlığın fəlakət səviyyəsi olaraq bilinən 5-ci səviyyədə olduğunun sübutlarla təsdiqləndiyi bildirilib.

IPC-nin hesabatında “22 ay davam edən amansız münaqişələrdən sonra Zolaqda yarım milyondan çox insan aclıq, yoxsulluq və ölümlə xarakterizə olunan fəlakət şəraiti ilə üz-üzədir,” – deyə qeyd olunub.

Qəzzada Aclıq Dəhşəti

İsrailin hücumları və humanitar yardımın girişini məhdudlaşdıran sərt blokadası altında olan Qəzza Zolağı, aclığın geniş yayıldığı, su, dərman, tibbi ləvazimatlar və gigiyena vasitələrinin tapılmadığı ciddi bir humanitar vəziyyət yaşayır.

Xüsusilə uşaqlar olmaqla, bölgədə aclıq səbəbindən ölümlər artmaqdadır. Yerli və beynəlxalq dairələr İsrailin “aclığı və susuzluğu silah kimi istifadə etdiyini” bildirirlər. Mülki infrastrukturu dağıdaraq ərazinin 88 faizini viran qoyan İsrail ordusu, köçürülmə əmrləri ilə yerindən etdiyi Fələstinliləri tez-tez sığındıqları ərazilərdə hədəfə alır. Bu hərəkətlər, mədəni soyqırım aktları kimi qiymətləndirilə bilər.

Təxminən 2,3 milyon əhalinin yaşadığı bölgədə İsrailin hücumları və köçürülmə əmrləri nəticəsində yerindən didərgin düşənlərin sayının 2 milyona çatdığı, bir çox insanın dəfələrlə köçürüldüyü qeyd olunur.

Əsas təchizatlardan məhrum şəkildə yerindən didərgin düşən Fələstinlilər, primitiv çadırlarda və ya həddindən artıq izdihamlı məktəblərdə gigiyena materiallarının çatışmazlığı, hətta tualetlərin belə qeyri-kafi olduğu, yoluxucu xəstəliklərin yayıldığı şəraitdə sağ qalmağa çalışırlar.

İsrail ordusu isə gündəlik həyata keçirdiyi hücumlarla yerindən didərgin düşənlərin çadırlarını və sığındıqları mülki məntəqələri bombalayır.

24 saat