BMT sülhməramlıları İsrailin Livanın cənubunda atəş açdığını bildirir

Birləşmiş Millətlər Təşkilatının Livan Müvəqqəti Qüvvələri (UNIFIL) bildirir ki, İsrail əsgərləri sülhməramlılarına atəş açıblar. Bu, İsrailin Hizbullahla bir illik atəşkəsi pozaraq Livan ərazisinə demək olar ki, gündəlik davam edən hücumlarının sonuncusudur. UNIFIL-dən verilən məlumata görə, bazar günü İsrail qüvvələri “Livan ərazisində İsrailin yaratdığı mövqedən Merkava tankı vasitəsilə UNIFIL sülhməramlılarına atəş açıb”. Bəyanatda ağır pulemyot güllələrinin sülhməramlı heyətdən təxminən 5 metr məsafəyə düşdüyü qeyd edilib. UNIFIL, tank İsrail mövqeyinə çəkildikdən 30 dəqiqə sonra sülhməramlıların təhlükəsiz şəkildə ərazini tərk edə bildiyini bildirib. İsrail tərəfi isə atəş açan əsgərlərinin “pis hava şəraiti” səbəbindən BMT patrulunu “şübhəlilər”lə səhv saldığını iddia edib. Livan ordusu da məsələ ilə bağlı açıqlama yayıb: “Ordu komandanlığı İsrail düşməninin davam edən pozuntularına və təhlükəli eskalasiyasına son qoymaq üçün dost ölkələrlə koordinasiyalı şəkildə işlədiyini təsdiqləyir.” Sentyabr ayında UNIFIL İsrail dronlarının UNIFIL sülhməramlılarına yaxın dörd qumbara atdığını bildirmişdi ki, bunlardan biri BMT personalı və nəqliyyat vasitələrindən 20 metr məsafədə yerə düşmüşdü. UNIFIL baş verən atəş açma hadisəsini “BMT Təhlükəsizlik Şurasının 2006-cı ildə İsrail və Hizbullah arasındakı münaqişəyə son qoyan və 2024-cü ilin noyabrında əldə edilmiş atəşkəs üçün əsas təşkil edən 1701 saylı qətnaməsinin ciddi şəkildə pozulması” kimi qiymətləndirib. Bazar günü UNIFIL, İsrail hücumlarını və sülhməramlılara qarşı aqressiv davranışları dayandırmaq üçün İsrail ordusuna (IDF) bir daha çağırış edib. UNIFIL, 2023-cü ilin oktyabrında Qəzza müharibəsinin başlamasından sonra alovlanan və tam miqyaslı müharibəyə çevrilən gərgin hərbi əməliyyatlara son qoyan atəşkəsi qorumaq üçün Livan ordusu ilə birlikdə işləyir. İsrailin Livana qarşı son müharibəsində 4000-dən çox insan, əsasən mülki şəxslər həlak olmuş, bir milyondan çox insan köçkün düşmüşdür. Onlarla kənd dağıdılmış və razılaşmada nəzərdə tutulan Livan ərazisində ən azı beş nöqtə hələ də işğal altında qalmaqdadır. İsrail iddia edir ki, Livana endirdiyi zərbələr Hizbullah obyektlərini və döyüşçülərini hədəf alır, lakin heç bir sübut təqdim etməyib.

İsrailin Livan ərazisində tikdiyi divar

Şənbə günü Livan hökumətinin rəsmi xəbər agentliyi olan Milli Xəbər Agentliyi bildirib ki, Livan, İsrailin öz cənub sərhədi boyunca “Mavi Xətt”i – Livan və İsrail arasında BMT tərəfindən müəyyən edilmiş 120 km-lik (75 mil) qeyri-rəsmi sərhədi kəsən beton divar tikməsi ilə bağlı BMT Təhlükəsizlik Şurasına şikayət verməyi planlaşdırır. Xəbər agentliyinin məlumatına görə, Livan prezidenti Jozef Aoun şikayətin, İsrail divarının 4000 kvadratmetr (43,055 kvadratfut) ərazini Livan xalqı üçün bağladığını təsdiqləyən son BMT hesabatları ilə birlikdə verilməsini tələb edib. Mavi Xəttin əsas məqsədi İsrail ordusunun BMT Təhlükəsizlik Şurasının qətnamələri ilə müəyyən edilmiş Livan ərazisindən çıxarılmasını təsdiqləməkdir. UNIFIL cümə günü bəyan edib ki, “İsrailin Livan ərazisindəki mövcudluğu və tikintisi Təhlükəsizlik Şurasının 1701 saylı qətnaməsinin, eləcə də Livanın suverenliyinin və ərazi bütövlüyünün pozulmasıdır”. Qurum əlavə edib: “Bir daha, İsrail ordusunu Mavi Xəttə tamamilə hörmət etməyə və ondan şimaldakı bütün ərazilərdən geri çəkilməyə çağırırıq.”

24 saat