Bolqarıstanda on minlər küçəyə çıxdı, qərar geri götürüldü

Bolqarıstanda genişmiqyaslı etirazlar hökuməti büdcə layihəsini geri çəkməyə məcbur etdi

2025-ci ilin sonlarına yaxın Bolqarıstanda on minlərlə insanın küçələrə axışmasından sonra hökumət, çərşənbə axşamı, 2026-cı il üçün nəzərdə tutulan büdcə layihəsini geri çəkdiyini elan etdi.

Daha yüksək xərclərin maliyyələşdirilməsi üçün vergi artımları planları ölkə daxilində ciddi aksiyalara səbəb oldu. Aksiya iştirakçıları barrikadalar qurdular, yandırdılar və polislə toqquşdular. Parlament binası üzərinə “Z Nəsli mafiyasız hökumət istəyir” şüarları proyeksiya edildi. Polis kütləni dağıtmaqda çətinlik çəkdi.

Bu hadisələrdən sonra Baş nazir Rosen Jelyazkovun azlıq hökuməti parlamentdən büdcə layihəsinin geri çağırılmasını tələb etdi. Hökumət tərəfindən verilən açıqlamada parlament qərarından sonra yeni bir büdcə prosesinə başlanılacağı bildirildi. Qeyd edək ki, parlament komitəsi layihəni hələ 18 noyabrda birinci oxunuşda qəbul etmişdi.

Etirazların dərin səbəbləri: Vergilər və avroya keçid dilemması

Bazar ertəsi axşamı paytaxt Sofiyada və digər şəhərlərdə on minlərlə insan küçələrə çıxdı. Müxalifət partiyaları və bəzi qeyri-hökumət təşkilatları sosial təminat primlərinin və dividend vergilərinin artırılmasına kəskin narazılıqlarını bildirdilər. Xalqın əsas narazılıqlarından biri də Bolqarıstan Levasının ləğv edilməsi və ölkə daxilində Avroya keçid planı idi.

Aksiyaçılar bu addımın həm həyat xərclərini artıracağını, həm də korrupsiya yolu ilə əldə edilmiş pulların yuyulması üçün şərait yaradacağını müdafiə edirlər. Bolqarıstan vətəndaşlarının təxminən yarısı Avroya keçidə qarşı çıxır.

Əmək nazirinin müavini İvan Krastev, yeni büdcə layihəsi qəbul edilmədiyi təqdirdə yoxsulluq həddindən aşağı olanlara ödənişlərin gecikə biləcəyi barədə xəbərdarlıq etdi. Lakin aksiya iştirakçıları geri addım atmaq niyyətində deyillər. Sosial təminat məsələsi də bu hadisələrin əsas gündəm mövzularından biridir.

24 saat