Çinin 3-cü təyyarədaşıyanı Fucien ilk təlim səfərini keçirdi

Çinin Yeni Nəsli: Fucien Gəmisi İlk Təlimini Başa Vurdu

Çinin dövlət televiziyası CCTV-nin yaydığı xəbərə əsasən, Fucien təyyarə gəmisi hərbi filo ilə ilk təlim səfərini başa vurduqdan sonra Xaynan adasındakı hərbi dəniz bazasına qayıdıb. Gəminin J-35 və J-15T döyüş təyyarələri, eləcə də J-15DT elektron müharibə və KJ-600 erkən xəbərdarlıq təyyarələrinin elektromaqnit buraxılış və tutucu enmə təlimləri keçirdiyi bu səfər, Fucien üçün "dənizdəki ilk real güc təlimi" olub.

Texnoloji Üstünlüklər və İstifadəyə Verilmə

Çinin cənub əyalətlərindən Fucianın adını daşıyan bu nəhəng gəmi 2022-ci il iyunun 17-də Şanxaydakı Cianqnan tərsanəsində suya salınmışdı. Suya salınmasından 40 ay sonra, 7 noyabrda Xaynan adasındakı hərbi dəniz bazasında keçirilən mərasimlə rəsmən istifadəyə verildi. Fucien, təyyarələrin buraxılışında itələmə, enmələrində isə idarə olunan tutulmaya imkan verən elektron fırlatma rampası texnologiyasına malik ilk təyyarə gəmisidir. Bu gəminin istifadəyə verilməsi ilə Çin, ABŞ-dan sonra bu texnologiyadan istifadə edən ikinci ölkə oldu.

Çin Donanmasının Üçüncü Gəmisi

Liaoninq və Şandonqdan sonra Çin donanmasına qatılan üçüncü Fucien təyyarə gəmisi, həm dizaynı, həm də istehsalı tamamilə yerli olan ilk nümunədir. İlk sınaq səfərini 2024-cü il mayın 1-dən 8-dək edən gəmi, doqquzuncu sınaq səfəri üçün sentyabrın 10-da limandan ayrılmış, Tayvan Boğazından keçərək Cənubi Çin dənizinə yola düşmüşdü. Bu sınaq səfərləri zamanı Çinin inkişaf etmiş dördüncü nəsil "J-15T", beşinci nəsil "J-35" döyüş təyyarələri, eləcə də yeni nəsil erkən xəbərdarlıq və nəzarət təyyarəsi "KJ-600" gəmi üzərində uğurla sınaqdan keçirilib.

Donanmanın Genişlənmə Hədəfləri

Çinin şimal-şərq əyaləti Liaoninqin adını daşıyan ilk gəmi 1998-ci ildə Ukraynadan alınan "Varyağ" gəmisinin skeleti üzərində inşa edilərək 2012-ci ildə istifadəyə verilmişdi. Şimal əyaləti Şandonqun adını daşıyan ikinci gəmi isə "Liaoninq"in dizaynı kopyalanaraq Çində istehsal edilmiş və 2017-ci ildə xidmətə alınmışdı. Gəmi sayına görə dünyanın ən böyük donanmasına sahib olan Çin, 2035-ci ilədək altı təyyarə gəmisindən ibarət donanma yaratmağı planlaşdırır.

24 saat