Donald Tramp dünya çempionatını izləməyə qadağa qoydu

Haiti milli futbol komandasının 1974-cü ildən bəri ilk dəfə kişilər arasında Dünya Kubokuna vəsiqə qazanması sevincini yaşayan Haiti azarkeşləri üçün pis xəbər gəldi. ABŞ prezidenti Donald Tramp administrasiyası Haiti tərəfdarlarının qarşıdakı yay Amerika Birləşmiş Ştatlarına girişinə icazə verməyəcəyini açıqlayıb.

Turnirə ev sahibliyi edəcək ABŞ, Meksika və Kanadadakı oyunlara qatılmağa haqq qazanan 42 ölkədən biri olsa da, Haiti azarkeşləri matçları canlı izləyə bilməyəcəklər.

ABŞ prezidenti Donald Trampın 2024-cü ilin iyun ayında imzaladığı səyahət qadağası çərçivəsində heç bir xüsusi güzəşt edilməyəcək. Bu qərar, Əfqanıstan, İran, Venesuela və Liviya da daxil olmaqla, 19 ölkə vətəndaşının ABŞ-a girişini məhdudlaşdırır.

Xarici İşlər Nazirliyindən açıqlama

Oyunçular, onların ailələri, texniki heyət və dəstək personalı üçün böyük idman tədbirlərinə qatılmaq məqsədilə istisna tətbiq olunacaq. Bu vəziyyət Haiti tərəfdarlarının 50 il sonra kubokda yarışacaq komandalarını canlı izləmək arzusunu hələlik puça çıxarıb.

ABŞ Xarici İşlər Nazirliyi bildirib ki, azarkeşlər viza üçün müraciət edə və müsahibə təyin edə bilərlər, lakin "viza ala bilməmək və ya ABŞ-a qəbul edilməmək ehtimalı var". Yalnız səfərlərinin "ABŞ-ın milli maraqlarını irəli aparacağı" düşünülən şəxslərə güzəşt edilə bilər, lakin bunun "çox nadir" hallarda baş verəcəyi vurğulanıb.

Komanda 4 ildir öz ölkəsində matç keçirə bilmir

Haiti, cinayətkar dəstələrin törətdiyi zorakılıqlar səbəbindən son dörd ildir ki, öz ölkəsində matç keçirə bilmir. Fransız baş məşqçi Sebastien Migne 18 ay əvvəl təyin olunmasına baxmayaraq, bu günə qədər Haiti torpağına ayaq basa bilməyib və ev oyunları 800 km uzaqlıqdakı Kurasao adasında keçirilir.

Migne bildirib: "Bu, qeyri-mümkündür, çünki çox təhlükəlidir. Adətən çalışdığım ölkələrdə yaşayıram, amma burada bunu edə bilmirəm. Artıq oraya beynəlxalq uçuşlar yoxdur."

Donald Tramp və Gianni Infantino arasında maraqlı dialoq

ABŞ prezidenti Donald Tramp, Ağ Evdə Dünya Kuboku Tapşırıq Qüvvəsi ilə görüşündə FİFA prezidenti Gianni Infantino ilə görüşüb. İki şəxs yaxın münasibətlərini davam etdirərkən, Infantinonun 79 yaşlı Trampa FİFA-nın ilk Sülh Mükafatını verməyi planlaşdırdığı bildirilib.

Turnirin iqtisadiyyatına toxunan ABŞ prezidenti Donald Tramp, əvvəlcədən hazırlanmış mətni oxuyaraq deyib: "Dünya Kuboku saysız-hesabsız amerikalı işçi və müəssisə üçün inanılmaz dərəcədə əhəmiyyətli bir iqtisadi fürsət olacaq. 30 milyard dollardan çox iqtisadi dövriyyə gözlənilir."

Lakin sonra mətnin xaricinə çıxaraq təəccüblə soruşub: "Gianni, bu barədə heç bir fikrim yoxdur! Çox pul kimi səslənir? Əminsən?"

24 saat