Əli Kərimliyə hazır pasportu verilmədi

Daxili İşlər Nazirliyindən Pasport Rəddi

Azərbaycan Xalq Cəbhəsi Partiyasının (AXCP) sədri Əli Kərimli Daxili İşlər Nazirliyinin ona xarici pasport verilməsinə imkan vermədiyini bildirib.

Oktyabrın 7-də bir gün ərzində pasport almaq üçün ASAN Xidmət mərkəzlərindən birinə müraciət edərək müvafiq rüsumu ödəyən partiya sədrinə sənədin növbəti gün hazır olacağı deyilmişdi.

Lakin oktyabrın 8-də ASAN Xidmətə yaxınlaşan Əli Kərimliyə bir neçə telefon zəngindən sonra pasport verilməkdən imtina edildiyi bildirilib. Partiya sədrinin sözlərinə görə, imtinanın səbəbini soruşduqda, əməkdaş daha yüksək vəzifəli bir xanımla məsləhətləşdikdən sonra ona pasport verilməsinə DİN-in Baş Pasport Qeydiyyat və Miqrasiya İdarəsinin icazə vermədiyini deyib. Qərar üçün heç bir izahat verilməyib və dünən ödənilən xidmət haqqı geri qaytarılıb.

Siyasi Motivlər və İttihamlar

AXCP sədri, pasport ala bilməməsi ilə bağlı bir ay əvvəl Baş prokuror Kamran Əliyevə də müraciət etsə də, hələ də cavab almadığını xatırladıb.

Əli Kərimli bu qərarın arxasında siyasi motivlərin dayandığını düşünür. O, Daxili İşlər Nazirliyinin aidiyyəti baş idarəsinə müraciət edəcəyini, lakin 20 il ərzində ona pasport verilməməsi və xarici səfərlərinə qadağa qoyulması barədə qərarın yalnız İlham Əliyev tərəfindən verilə biləcəyini vurğulayıb.

"Görünür Əliyevsayağı ədalət, rəqabət belə olur. Ancaq hər zaman belə olmayacaq. O topal ədalət bir gün bizim ölkəmizə də gəlib çatacaq. İndi yaşadığımız absurdlar isə tarix olacaq. Avtoritarizmin, tək adam hakimiyyətinin bağlanacaq kitabının sadəcə bir səhifəsi olacaq", – deyə o əlavə edib.

Partiya sədri yaxın vaxtlarda Varşava, Afina, Riqa və Praqada keçirilən beynəlxalq forumlara dəvət olunduğunu da qeyd edərək, xarici pasport ala bilməməsi məsələsini bir daha gündəmə gətirib.

Məhdudiyyətin Arxa Planı

Əli Kərimlinin xarici pasportunun etibarlılıq müddəti 2006-cı ildə bitib. O vaxtdan bəri yeni sənəd almaq üçün etdiyi müraciətlər dəfələrlə rədd edilib. Pasport verilməməsinə əsas səbəb kimi 1994-cü ildə başlanmış cinayət işinin hələ də açıq qalması göstərilir.

1994-cü ilin sentyabrında onun barəsində cinayət işi başladılmışdı. Həmin vaxt hüquq-mühafizə orqanları onun cibindən partladıcı maddə tapıldığını iddia etmiş, AXCP sədri isə bu ittihamları qəti şəkildə rədd etmişdi.

24 saat