Əsadsız Suriya seçkiyə gedir

Suriyada Bəşər Əsəd rejiminin istefasından sonra ilk Suriya seçkiləri keçirilir.

Təhlükəsizlik səbəbləri ilə Raqqa, Həsəkə və Süveyda illərində səsvermə məntəqələri qurulmadığı açıqlanıb. Raqqa və Həsəkənin Suriya Demokratik Qüvvələri (SDQ) tərəfindən nəzarət edildiyi, Süveyda bölgəsində isə İsrailin dəstəklədiyi Druz qruplarının aktiv olduğu bildirilir.

Bu üç il ümumilikdə 32 millət vəkili ilə təmsil olunacaqdı. Lakin səsvermə məntəqələrinin qurulmaması səbəbindən bu yerlərin boş qalacağı gözlənilir.

MƏCLİSİN ÜÇDƏ BİRİNİ ƏHMƏD ŞARA TƏYİN EDƏCƏK

Suriya Xalq Məclisinin 210 yerindən 140-ı “seçki komitələri” tərəfindən müəyyən ediləcək. Qalan 70 millət vəkili isə birbaşa Prezident Əhməd Şara tərəfindən təyin olunacaq.

Suriya seçkilərinə 1500 namizəd müraciət edib. Namizədlərin hamısının eyni zamanda seçki komitəsinin üzvü olması şərt qoyulub, komitələrdə ən azı 20 faiz qadın təmsilçiliyi də məcburi hesab edilib.

ƏHMƏD ŞARADAN AÇIQLAMALAR

Seçki günü Milli Kitabxanada rəsmilərlə bir araya gələn Keçid administrasiyasının prezidenti, HTŞ lideri Əhməd Şara, verdiyi açıqlamada Suriyanın içində olduğu həssas prosesə diqqət çəkərək bunları qeyd edib:

“Müharibə və xaos şəraitindən qısa zamanda Suriya seçkiləri prosesinə keçid xalqımızın iradəsinin və dövlət qabiliyyətinin göstəricisidir. Bu, fərdi deyil, kollektiv səylərin uğurudur.”

Şara, həmçinin Məclisin qanunvericilik vəzifələrinə yenidən başlaya bilməsi üçün millət vəkillərinin üzərinə böyük məsuliyyət düşdüyünü vurğuladı: "Gözləməkdə olan qanunların və büdcə layihələrinin həyata keçirilməsi üçün Məclisi fəaliyyətə qaytarmalıyıq. Qanunların işləkliyini təmin etmək, hökumətə nəzarət etmək millət vəkillərimizin borcudur."

Suriya seçkilərinin sülh və sabitlik prosesinə töhfə verəcəyini ümid edən Əhməd Şara, nəticələrin ölkə üçün “yeni bir səhifə” olacağını bildirib.

Suriyada yarım əsrdən çox davam edən Baas rejimi, 8 dekabr 2024-cü ildə Şamın müxalif qüvvələrin əlinə keçməsi ilə sona çatdı. Heyət Təhrir əş-Şam (HTŞ) rəhbərliyindəki silahlı qruplar noyabrın sonunda Hələb ətrafında başlatdığı əməliyyatlarla qısa zamanda ölkənin geniş bir hissəsində nəzarəti ələ alaraq Bəşər Əsəd rejiminin çöküşünə səbəb olmuşdu.

24 saat