Etna vulkanında güclü püskürmə: Kataniya hava limanında uçuşlar dayandırıldı

Etna vulkanında güclü püskürmə: Kataniya Hava Limanında uçuşlar dayandırıldı

İtaliyanın Siciliya adasında yerləşən və Avropanın ən aktiv vulkanı olan Etna yenidən fəaliyyətə keçərək bölgədə narahatlıq yaradıb. Vulkanın püskürtdüyü sıx kül buludları səmanı bürüyərək bölgədəki hava nəqliyyatına mənfi təsir göstərib.

Kataniya Hava Limanının operatoru SAC tərəfindən verilən rəsmi açıqlamada, vulkanik aktivliyin təhlükəsizliyi təhdid etməsi səbəbindən bütün gələn uçuşların müvəqqəti olaraq dayandırıldığı bildirilib. Səlahiyyətlilər, kül yağışının uçuş təhlükəsizliyi baxımından ciddi risk yaratdığını vurğulayıblar.

Mütəxəssislər Etnanın yeni bir püskürmə mərhələsinə girdiyini və vulkanik fəallığın yaxından izlənildiyini qeyd ediblər. Bölgədəki seysmik hərəkətlilik səbəbindən hava limanı rəhbərliyi sərnişinləri uçuş statuslarını aviaşirkətlərdən dəqiqləşdirmələri barədə xəbərdar edib.

Etna vulkanı zaman-zaman nümayiş etdirdiyi bu cür aktiv proseslərlə yerli əhali və aviasiya sektoru üçün daim nəzarət tələb edir. Hazırkı məlumata görə, hər hansı bir insan tələfatı və ya xəsarət alan olmayıb, lakin bölgədə təhlükəsizlik tədbirləri ən yüksək səviyyədə saxlanılır.