FBI-da böhran: Agent hesabatında sarsıdıcı iddialar

FBI Direktoru Kash Patelin İdarəçiliyi Sərt Tənqidlərə Səbəb Olub

ABŞ Federal Təhqiqatlar Bürosunun (FBI) aktiv və təqaüddə olan bəzi agentləri tərəfindən hazırlanan hesabatda, FBI Direktoru Kash Patelin rəhbərliyi altında qurum "dümənsiz gəmiyə" bənzədilib. ABŞ mediasına sızan 115 səhifəlik hesabatda qeyd olunur ki, FBI Direktoru Patel, 24 aktiv və təqaüddə olan əməkdaş, həmçinin bəzi analistlərdən ibarət bir ittifaqın kəskin tənqidləri ilə üzləşib. Hesabatda FBI "dümənsiz bir gəmi" və "tamamilə bərbad" olaraq xarakterizə edilərkən, qurumun direktoru Kash Patel üçün "uğur qazanmaq üçün lazımi təcrübəyə və ya duruşa malik olmadığı" ifadələri yer alıb.

Patelin Rəhbərliyinə Yönəlik Ciddi İttihamlar

Patelin liderliyinin ilk altı ayını əhatə edən sənəddəki mənbələr, FBI Direktorunun "başının böyük işlərlə qarışdığını" və onun müavini Dan Bonginonun isə "bir növ kloun" olduğunu iddia edirlər.

Kash Patelə yönəldilən güclü tənqidlərin bir hissəsi, bu müddət ərzində silahlı hücum nəticəsində öldürülən Respublikaçı fəal Charlie Kirkin sui-qəsdindən sonra nümayiş etdirdiyi mövqe və davranışlardan irəli gəlir. Patel, Charlie Kirk istintaqını təhlükə altına ala biləcək erkən ictimai açıqlamalar vermək, şübhəli şəxs həbs edildikdə digər qurumların işini özünə aid etmək və səlahiyyətli agentə qışqırıb təhqir etməklə ittiham olunur.

Patelə qarşı irəli sürülən iddialar arasında şəxsi səyahətləri üçün hökumət təyyarələrindən istifadə etmək, sevgilisini qorumaq üçün xüsusi təyinatlı qrupu (SWAT) cəlb etmək və aktiv təhqiqatlar zamanı vaxtsız ictimai açıqlamalar vermək də var.

Sözügedən hesabatın bu həftə sonu ABŞ Təmsilçilər Palatası və Senatın Ədliyyə komitələrinə təqdim edilməsi gözlənilir.

24 saat