FHN katibliyində nazir adından dələduzluq

FHN zabiti Ramil Eyvazov fırıldaqçılıqda ittiham olunur

Fövqəladə Hallar Nazirliyinin (FHN) Katibliyinin Əmr və qərarların icrasına nəzarət şöbəsinin keçmiş baş zabiti, leytenant Ramil Eyvazov nazir Kəmaləddin Heydərovun adından sui-istifadə edərək vətəndaşları aldatmaqda ittiham edilir. İddialara görə, o, müxtəlif şəxslərə onların qohumlarını nazirliyin Yanğından Mühafizə Xidmətinin İsmayıllı, Beyləqan və Ağdam rayon şöbələrinə yanğınsöndürən kimi qəbul etdirəcəyini vəd edib. Hər bir işə düzəltmə əməliyyatı üçün 11-12 min manat tələb edildiyi bildirilir. FHN-in Bakı Regional Mərkəzinə zabit vəzifəsinə işə düzəltmənin isə 25 min manata başa gəldiyi iddia olunur. Cinayət işinin materiallarında qeyd olunur ki, Ramil Eyvazov zərərçəkənlərlə söhbətlərində FHN-in yüksək vəzifəli şəxslərinin adından istifadə edərək, alınan pulun onlara çatacağını bəyan edib. O, həmçinin işə qəbul olunan şəxsləri nazirin vətəndaş qəbuluna saldırmağı, idman və tibbi müayinə imtahanlarından keçməyə yardım göstərməyi vəd edib. Məlumata görə, hər bir işə düzəltmə prosesi üçün alınan ümumi məbləğdən 500 manatı idman imtahanı, 150 manatı imtahan rüsumu, 200 manatı isə sənədləşmə haqqı kimi hesablanıb.

Zərərçəkənlər və şikayətlərin geri çəkilməsi

Hazırkı cinayət işində iki nəfər zərərçəkən qismində tanınıb. Bildirilir ki, bu şəxslər öz həmkəndlilərindən və qohumlarından işə düzəltmə adı ilə pul alaraq FHN əməkdaşına veriblər. Zərərçəkənlər ifadələrində Ramil Eyvazovun nazirlikdəki mövqeyinə güvənərək bu əmələ razılaşdıqlarını vurğulayıblar. Onlardan biri hətta öz oğlunu da işə düzəltmək üçün pul ödədiyini bildirib.

Məhkəmə prosesi və azadlığa buraxılma

Özünü qismən təqsirli sayan Ramil Eyvazov adamlardan işə düzəltmə adı ilə pul aldığını təsdiqləyir, lakin ittihamda göstərilən məbləğlərlə razılaşmır. O, bu addımı atmasına səbəb kimi anasının xəstəliyi və pula ehtiyacı olduğunu göstərib. İlkin olaraq ev dustaqlığında olan FHN zabiti daha sonra həbs edilib. Bu ilin iyul ayında Bakı Hərbi Məhkəməsinin hökmü ilə ona 5 il həbs cəzası kəsilsə də, son günlərdə apellyasiya məhkəməsi onun azadlığa buraxılması barədə qərar qəbul edib. Məhkəmə iclasında Ramil Eyvazov həbsindən sonra atasının zərərçəkənlərə dəymiş ziyanı tam şəkildə ödədiyini bildirib. Zərərçəkənlər də bu faktı təsdiqləyərək məhkəməyə ərizə təqdim edib, şikayət və tələblərinin olmadığını qeyd ediblər. Onlar leytenantın azadlığa buraxılmasına etiraz etməyiblər.

24 saat