Fikrət Cəfərli azad edildi

Fikrət Cəfərli azadlığa buraxıldı

İşgəncələr Əleyhinə Araşdırmalar Mərkəzinin sədri Fikrət Cəfərli cəza müddətini başa vuraraq azadlığa çıxıb. Bu barədə təşkilatın rəsmi "Facebook" səhifəsində məlumat yayılıb. Barəsində 4 ay azadlıqdan məhrumetmə cəzası olan hüquq müdafiəçisi noyabrın 29-da cəza müddətini tamamlayıb.

4 aylıq məhkumiyyətin təfərrüatları

Fikrət Cəfərli iyulun 29-da Binəqədi Rayon Məhkəməsində keçirilən hazırlıq iclasında hakim Zamiq Bağırovun hökmü ilə 4 ay müddətinə azadlıqdan məhrum edilmişdi. Hüquq müdafiəçisi Azərbaycan Cinayət Məcəlləsinin 147.1-ci maddəsi (böhtan) ilə ittiham olunurdu. Bu maddə yalan olduğu bilindiyi halda, hər hansı şəxsin şərəf və ləyaqətini ləkələyən və ya onu nüfuzdan salan məlumatların kütləvi çıxışlarda, kütləvi nümayiş etdirilən əsərdə və ya kütləvi informasiya vasitələrində yayılmasını nəzərdə tutur.

İddianın mahiyyəti

Fikrət Cəfərliyə qarşı iddianı Vəkillər Kollegiyasının İntizam Komissiyasının üzvü, vəkil Elvin Əliyev qaldırmışdı. İyulun 8-də keçirilən iclasda Cəfərli Əliyevin iddiası əsasında təqsirləndirilən şəxs qismində tanınmışdı. Vəkilin iddiasına görə, Fikrət Cəfərlinin rəhbərlik etdiyi İşgəncələr Əleyhinə Araşdırmalar Mərkəzinin "Facebook" səhifəsində onun keçmiş müvəkkilinə istinadən yalan məlumat yayımlanıb. Həmin məlumatda vəkilin hazırda həbsdə olan müvəkkilindən 10 500 manat ödəniş aldığı, lakin vəd etdiyi hüquqi müdafiəni təmin etmədiyi və onu hədələdiyi iddia olunurdu.

Hüquq müdafiəçisinin mövqeyi

Hüquq müdafiəçisi Fikrət Cəfərli isə sözügedən məlumatın onun şəxsi mövqeyi olmadığını bəyan edib. O, işin icraata götürülməsini Vəkillər Kolleqiyasını tənqid etməsinə cavab olaraq, siyasi sifariş əsasında edildiyini düşünür.

24 saat