Gecə saat 3-də oyananlar üçün həkimdən qızıl məsləhət

Gecə Yarısı Oyanma Sindromu və Həlli

cognitive shuffling - Gecə saat 3-də oyananlar üçün - Səhərin erkən saatlarında yuxudan oyanıb yenidən yata bilmirsiniz? Bu, çoxlarının üzləşdiyi ciddi bir narahatlıqdır. Xüsusilə də səhər saat 7-də işdə olmaq məcburiyyətində olduğunuz zaman gecə yuxusunun pozulması son dərəcə əsəbiləşdiricidir. 2008-ci ildə aparılan bir araşdırmaya görə, hər üç nəfərdən biri həftədə ən azı üç dəfə gecə yarısı yuxudan oyanır. Unutmaq olmaz ki, keyfiyyətli yuxu sağlamlıq üçün həyati əhəmiyyət daşıyır. Kifayət qədər yatmamaq yüksək qan təzyiqi, ikinci tip diabet və hətta Altsheymer xəstəliyi riskini artıra bilər.

Böyük Britaniyada fəaliyyət göstərən və ITV telekanalının səhər proqramlarından tanınan həkim Əmir Xan, bu yayğın yuxu problemi ilə bağlı öz tövsiyələrini bölüşüb. O, sosial media hesabında yayımladığı videoda izləyicilərin çoxsaylı suallarına cavab olaraq gecə oyanmalarından sonra yenidən yuxuya getməyin yollarını izah edib. Həkimin sözlərinə görə, iş, pul, uşaqlar, planlaşdırma və problemlərin həlli kimi stressli düşüncələr beynin həddindən artıq aktiv qalmasına səbəb olur və yuxuya getməyə mane olur.

Koqnitiv Qarışdırma Metodu Necə Tətbiq Olunur?

Həkim Əmir Xan bu vəziyyətdən çıxış yolu kimi “koqnitiv qarışdırma” adlanan metodu təklif edir. O bildirir: “Bu metodun məqsədi sürətlə axan düşüncələrinizi dayandırmaq, onları qarışdıraraq beyninizi yuxu rejiminə keçməyə təşviq etmək və yatmağın təhlükəsiz olduğuna inandırmaqdır.” Koqnitiv qarışdırma termini ilk dəfə 2009-cu ildə doktor Lük Boduen tərəfindən irəli sürülüb. Doktor Boduen bu üsulun onun şəxsi yuxu problemi olan yuxusuzluğu aradan qaldırdığını iddia edir.

Metodun tətbiqi olduqca sadədir. Əvvəlcə ağlınızda təsadüfi bir söz tutursunuz, məsələn, “yemiş”. Sonra bu sözün ilk hərfinə, yəni “y” hərfinə fokuslanırsınız. Ardınca bu hərflə başlayan bir sıra sözləri sadalamalısınız: yastıq, yarpaq, yorğan, yupyumşaq, yaylaq və s. Hər sözü tələffüz etdikdən sonra onu zehninizdə canlandırmağa çalışın. Daha sonra əsas sözünüzün ikinci hərfinə (“e” hərfi) keçərək eyni prosesi təkrarlayın. Bu qayda ilə sözün bütün hərfləri üzrə davam etmək, qısa müddətdə yenidən yuxuya getməyinizə kömək edəcək.

Bəs bu üsul niyə işləyir? CNN-in məlumatına görə, insanlar yuxuya getməyə başlayanda “mikro yuxular” görürlər ki, bu da fraqmentləşmiş düşüncə formaları ilə xarakterizə olunur. Koqnitiv qarışdırma zamanı eyni hərflə başlayan, bir-biri ilə əlaqəsiz obyektləri vizuallaşdırmaqla biz əslində həmin prosesi təqlid edirik. Bu, həm də diqqətimizi yata bilməmək faktından yayındırır. Nəşrin hesabatına görə, bu metod orta hesabla 5-15 dəqiqə ərzində insanların yuxuya getməsinə şərait yaradır.

24 saat