Guterreş: Qəzza xalqını aclığa məhkum etmək qəbuledilməzdir

BMT-də Fələstin Məsələsi Müzakirə Olundu

Birləşmiş Millətlər Təşkilatının Baş katibi Antonio Quterreş təşkilatda təşkil edilən Fələstin məsələsinə sülh yolu ilə həll yolu tapılması və iki dövlətli həllin reallaşdırılması mövzusunda Yüksək Səviyyəli Beynəlxalq Konfransın açılışında çıxış edib.

Quterreş bildirib ki, bu gün problemlərə tam şüurlu yanaşaraq qarşıdakı çətinliklərin fərqindədirlər. O, İsrail-Fələstin münaqişəsinin ümidləri, diplomatiyanı, saysız-hesabsız qətnamələri və beynəlxalq hüququ heçə sayaraq nəsillər boyu davam etdiyini xatırladıb.

Quterreş münaqişənin hələ də can almağa, gələcəyi məhv etməyə və həm bölgəni, həm də dünyanı qeyri-sabitləşdirməyə davam etdiyini vurğulayıb.

Digər tərəfdən, Birləşmiş Millətlər Təşkilatının Baş katibi bu münaqişənin davam etmək məcburiyyətində olmadığını qeyd edərək deyib: “Həll mümkündür. Bunun üçün siyasi iradə və cəsarətli liderlik tələb olunur. Eyni zamanda, reallığı dərk etmək lazımdır. Reallıq ondan ibarətdir ki, biz dönüş nöqtəsindəyik. İki dövlətli həll əvvəlkindən daha uzaqdır.”

Qəzzadakı Vəziyyət Qəbuledilməzdir

Quterreş Qəzza xalqının dünyanın gözü qarşısında məhv edilməsi və aclığa məhkum edilməsinin heç bir şəkildə əsaslandırıla bilməyəcəyini vurğulayıb.

Qəzzada on minlərlə mülki vətəndaşın öldürüldüyünü, işğal altındakı Fələstin torpaqlarının parçalandığını bildirən Quterreş sözlərini belə davam etdirib:

“Bölgədəki demoqrafik strukturun dəyişdirilməsi, inandırıcı siyasi üfüqün olmaması və keçən həftə Knessetdə səsə qoyulan bəyannamədə ifadə olunan, işğal altındakı İordan çayının qərb sahilinin ilhaqına dəstək… Açıq şəkildə bildirək, işğal altındakı İordan çayının qərb sahilinin addım-addım ilhaq edilməsi qanunsuzdur. Buna son qoyulmalıdır. Qəzzanın tamamilə dağıdılması qəbuledilməzdir. Buna son qoyulmalıdır. İki dövlətli həlli əbədi olaraq məhv edəcək birtərəfli hərəkətlər qəbuledilməzdir. Buna da son qoyulmalıdır. Bunlar tək-tək hadisələr deyil. Yaxın Şərqdə sülhün təməlini sökən sistematik bir reallığın tərkib hissəsidir. Lakin məhz bu qaranlıq mənzərə səbəbindən, iki dövlətli həlli reallaşdırmaq üçün daha çox iş görməliyik.”

Sülh üçün Əvəzolunmaz Fürsət

Quterreş bugünkü konfransın “nadir və əvəzolunmaz” bir fürsət təşkil etdiyini və “xoş niyyətli ritorik məşqə” çevrilməməsinin vacibliyini vurğulayıb.

Konfransın işğalın sonlandırılmasına və həyata keçirilə bilən iki dövlətli həll istiqamətində ortaq hədəfin reallaşdırılmasına doğru geriyə dönməz irəliləyişi təmin edəcək bir dönüş nöqtəsi ola biləcəyini qeyd edən Quterreş deyib: “İki dövlətli həll beynəlxalq hüquqa əsaslanan, bu Baş Məclis tərəfindən təsdiq edilmiş və beynəlxalq ictimaiyyət tərəfindən dəstəklənən yeganə çərçivədir.”

Quterreş bütün tərəflər tərəfindən tanınan, müstəqil, bir-birinə bitişik, demokratik və suveren iki dövlətin beynəlxalq cəmiyyətə tam inteqrasiyasını təmin edən bu çərçivənin İsraillilərlə Fələstinlilər arasında ədalətli və davamlı sülhə aparan yeganə etibarlı yol olduğunu bildirərək, bunun da daha geniş Yaxın Şərqdə sülhün əvəzolunmaz şərti olduğunu vurğulayıb.

İsrailin, Fələstinin və digər ölkələrin bu yolda çətin qərarlar qəbul etməli olacaqlarına işarə edən BMT Baş katibi sözlərini belə yekunlaşdırıb: “Bütün tərəflərdən cəsarətli və prinsipial liderlik tələb olunacaq. Biz bu səyləri təşviq etmək və dəstəkləmək üçün buradayıq. İsrail və Fələstin xalqı, həmçinin bütün bəşəriyyət üçün həyati əhəmiyyət kəsb edən bu məsələni irəli aparmaq üçün bir araya gəldiyinizə görə təşəkkür edirik.”

24 saat