Milano’dan İspaniyanın Asturiya bölgəsinə uçmaq üçün hazırlıq görən Volotea Hava Yollarına məxsus “Airbus A319” tipli təyyarə, havaya qalxma manevri edərkən ağılasığmaz bir hadisə ilə qarşılaşıb. İddiaya görə, polisin dayandırmağa çalışdığı şəxsiyyəti məlum olmayan bir nəfər təhlükəsizlik baryerini aşaraq uçuş zolağına qaçıb və özünü təyyarənin
mühərrikinə atıb. Həmin anların görüntüləri yayılıb.
Dəhşətli Anlar Təyyarə İçində
Hadisə baş verən zaman təyyarədə olan bir sərnişin yaşadıqlarını belə təsvir edib: “Qəfil partlayış səsi eşitdik. Pəncərədən çölə baxan bəzi sərnişinlər təşvişə düşərək əllərini başlarının arasına aldılar. Kabin heyəti bizə dərhal ‘Qətiyyən çölə baxmayın, görmək istəməyəcəyiniz bir hadisə var’ dedi.” Təyyarənin kapitan
pilotu isə hadisədən sonra etdiyi elanla “çox ciddi bir vəziyyətin yaşandığını və uçuşun təxirə salındığını” bildirib.
Hadisənin Təfərrüatları və Araşdırma
Baş verən hadisə ilə bağlı Berqamo polis idarəsi və prokurorluq orqanları araşdırmalara başlayıb. İlkin tapıntılara görə, həyatını itirən şəxsin keçmişdə narkotik istifadəsi ilə bağlı qeydiyyatda olduğu müəyyən edilib. Görgü şahidlərindən biri hadisəni bu cür nəql edib: “Başqa bir təyyarəyə minərkən hər şeyi gördüm. Əməkdaşlar həmin şəxsi saxlamağa çalışdı, lakin o, təyyarənin sol
mühərrikinə doğru qaçaraq özünü içərisinə atdı. Heç görmək istəməyəcəyimiz bir hadisə idi.” Mütəxəssislər, təyyarənin mühərriklərinin həmin vaxt dəqiqədə təxminən 15 min dövrlə işlədiyini, buna görə də qəzanın qaçılmaz olduğunu qeyd ediblər.
Havayolu Şirkətindən Rəsmi Açıqlama
Volotea Hava Yolları tərəfindən verilən rəsmi açıqlamada isə qeyd olunub: “
Bergamo Havalimanında baş verən qəzada, təyyarəmizlə əlaqəsi olmayan bir şəxs həyatını itirib. Təyyarəmizdəki 154 sərnişin və 6 ekipaj üzvünün hamısı təhlükəsizdir və uçuşumuz təxirə salınıb.” Həmçinin, səhər saatlarında baş verən faciəvi hadisə səbəbindən
Bergamo Havalimanına enəcək uçuşlar Milan, Verona və Bolonya kimi yaxın hava limanlarına istiqamətləndirilib.
24 saat
Oxucu Şərhləri
Şərh Yaz