Honq Konqda 123 qurban: Üç günlük yas elan edildi

Honq Konq idarəsi şəhərdə son 80 ilin ən ölümcül yanğınında həyatını itirənləri anmaq üçün üç günlük matəm elan edib.

Şənbə səhəri hökumət binasının önündə keçirilən mərasimdə Honq Konq sədri Con Li və digər rəsmilər üç dəqiqəlik sükutla ehtiramlarını bildirdilər.

Çin və Honq Konq bayraqları yarıya endirildi. Səlahiyyətli orqanlar şəhər boyunca əhalinin başsağlığı kitablarına imza ataraq hörmətini bildirə biləcəyi anım məntəqələri quraşdırdılar.

Dəhşətli Yanğının Ağır Nəticələri

Çərşənbə günü bambuk karkaslar və yaşıl şəbəkələrlə örtülü göydələnlərdə başlayan ölümcül yanğında həyatını itirənlərin sayı 128-ə çatdı. Son məlumata görə, 150 nəfər hələ də itkin düşmüş hesab olunur.

Wang Fuk Court adlı yaşayış kompleksinin səkkiz blokundan yeddisinə sürətlə yayılan alovları nəzarət altına almaq üçün təxminən iki min yanğınsöndürən iki günə yaxın müddətdə mübarizə apardı.

Yanğının dəqiq səbəbi hələlik müəyyən edilməyib. Lakin səlahiyyətli orqanlar binanın xarici fasadındakı polistirol örtüyünün, bambuk karkasların və qoruyucu şəbəkələrin alovun yayılmasını asanlaşdıra biləcəyini qeyd edib.

İstintaq Genişlənir: 11 Nəfər Həbs Edildi

Honq Konq yanğını sonrası şəhərdə böyük bir hiddət dalğası yaşanır. Sakinlər yanğın siqnallarının nasaz olduğunu və göydələnlərin təmir işlərini həyata keçirən şirkətin ciddi səhlənkarlığına yol verdiyini iddia edirlər.

Təmir işləri ilə əlaqədar korrupsiya şübhəsi ilə daha 8 nəfər həbs edilib. Bundan əvvəl də üç nəfər ehtiyatsızlıqdan ölümlə nəticələnən hadisəyə səbəb olma ittihamı ilə saxlanılmışdı. Beləliklə, həbs edilənlərin ümumi sayı 11-ə yüksəlib.

Müstəqil Korrupsiyaya Qarşı Mübarizə Komissiyası saxlanılanlar arasında bir mühəndislik firmasının rəhbərləri və karkas podratçısının nümayəndələrinin olduğu bildirilib.

1983-cü ildə tikilmiş Wang Fuk Court, 2021-ci il əhalinin siyahıyaalınmasına əsasən, 4600 nəfərin yaşadığı 1984 mənzildən ibarət idi.

24 saat