İran Xarici İşlər Nazirliyi: Ukrayna Xəzərdəki ticarət gəmimizə zərbə endirib

İran XİN: Ukrayna Xəzər dənizində ticarət gəmimizə hücum edib

İran Xarici İşlər Nazirliyi Ukrayna Silahlı Qüvvələrinin Xəzər dənizində üzən İran ticarət gəmisinə zərbə endirdiyini açıqlayıb. Rəsmi Tehran bu hadisəni beynəlxalq hüquq prinsiplərinin kobud şəkildə pozulması kimi dəyərləndirərək, baş verənləri qətiyyətlə pisləyib.

İranın xarici işlər naziri Abbas Araqçi məsələ ilə əlaqədar BMT Təhlükəsizlik Şurasına və Avropa İttifaqına rəsmi müraciət ünvanlayıb. O, beynəlxalq təşkilatları bu təxribatçı hücuma qarşı təcili tədbirlər görməyə və müvafiq mövqe nümayiş etdirməyə dəvət edib.

Tehran rəsmiləri bir daha vurğulayıblar ki, İran Rusiya-Ukrayna müharibəsində tərəf tutmur və münaqişəyə heç bir formada müdaxilə etmir. Bəyanatda qeyd olunur ki, mülki ticarət gəmilərinin hədəfə alınması dəniz təhlükəsizliyi üçün ciddi təhlükə mənbəyidir.

Hazırda insidentin detalları və gəmiyə vurulan ziyanın həcmi ilə bağlı araşdırmalar aparılır. Ukrayna tərəfi isə hələlik bu ittihamlarla bağlı hər hansı rəsmi açıqlama verməyib.