İspaniyada meşə yanğınları: 8 min hektardan artıq ərazi külə dönüb

İspaniyada meşə yanğını: 8 min hektardan çox ərazi külə dönüb

İspaniyanın Huelva əyalətinin Niebla bölgəsində baş verən genişmiqyaslı meşə yanğını nəzarətdən çıxıb. Rəsmi məlumatlara əsasən, yanğın artıq 8 min hektardan çox sahəni əhatə edib və təhlükəsizlik məqsədilə 500-ə yaxın yerli sakin yaşadıqları evlərdən təxliyə olunub.

Alovun gözlənilməz istiqamətlərdə yayılması və əlverişsiz hava şəraiti yanğınsöndürmə işlərini xeyli çətinləşdirir. Yanğının Sevilya əyaləti istiqamətində genişlənməsi yerli hakimiyyət orqanlarını ciddi tədbirlər görməyə məcbur edib.

İspaniya hökuməti bölgədəki vəziyyətlə bağlı yerli qurumlarla koordinasiyalı şəkildə işlədiyini bəyan edib. Yanğının qarşısını almaq üçün hərbi fövqəladə hallar bölmələri (UME) və müxtəlif xüsusi texnikalar əraziyə cəlb olunub.

Mütəxəssislər yanğının sürətlə yayılmasını və miqyasını nəzərə alaraq, təhlükəsizlik tədbirlərinin daha da gücləndirildiyini vurğulayırlar. Hazırda bölgədəki təbiət parklarının və yaşayış məntəqələrinin mühafizəsi əsas prioritet kimi müəyyən edilib.