İsrailin Dəməşqə hücumlarına dünya reaksiyası

Suriya paytaxtı Dəməşq İsrailin növbəti hava zərbələri ilə sarsılıb. Hadisə, hökumət qüvvələri ilə Druz silahlı qruplaşmaları arasında atəşkəsin pozulmasından sonra Suriyanın cənub-qərbindəki Suveyda şəhərində davam edən qarşıdurmalar fonunda baş verib. Müdafiə naziri İsrail Katz çərşənbə günü verdiyi açıqlamada, Suriya hökumət qüvvələrinin Suveyddən çəkilməsini tələb etməsindən bir neçə saat sonra İsrailin hava zərbələrinin Suriya Müdafiə Nazirliyinin girişi yaxınlığına endirildiyini bildirib. Daha bir zərbə isə şəhərin kənarında, prezident sarayının yaxınlığına düşüb. Suriya dövlət mediasının Səhiyyə Nazirliyinə istinadən verdiyi məlumata görə, hücumlarda ən azı bir nəfər həlak olub, 18 nəfər isə yaralanıb. Bu hücumlar, Suveyda şəhərində davam edən çaxnaşmalar fonunda baş verir. Şəhərdə yerli sünni bədəvi tayfaları ilə İsrailin Suriyada potensial müttəfiqi kimi gördüyü və qorumaq üçün müdaxilə etdiyini iddia etdiyi Druz azlığının döyüşçüləri arasında şiddətli toqquşmalar yaşanır. Dəməşq çərşənbə axşamı şəhərə qüvvələr yerləşdirərək atəşkəs elan etsə də, döyüşlər tezliklə yenidən başlayıb. Hücumlara beynəlxalq reaksiyalar isə müxtəlif istiqamətlərdən gəlib.

Birləşmiş Ştatlar

ABŞ Dövlət Katibi Marko Rubio, şiddətin artmasından "çox narahat" olduqlarını bildirib. Rubio, "Bu məsələ üzərində işləyəcəyik... Müvafiq tərəflərlə danışıqları indicə bitirdim. Çox narahatıq və ümid edirəm ki, bu günün sonunda yeni məlumatlar olacaq. Amma vəziyyətdən ciddi narahatlıq duyuruq," deyə qeyd edib.

Türkiyə

Türkiyə Xarici İşlər Nazirliyi hücumları pisləyərək, onların Suriyanın sülh, sabitlik və təhlükəsizlik səylərinə sabotaj cəhdi olduğunu qeyd edib. Nazirlik, "Suriya xalqının sülh içində yaşamaq və dünyayla inteqrasiya etmək üçün tarixi bir fürsəti var. Bu fürsəti dəstəkləyən bütün maraqlı tərəflər, Suriya hökumətinin sülhü bərpa etmək səylərinə töhfə verməlidir," açıqlamasını yayıb. Prezident Rəcəb Tayyib Ərdoğanın hakim Ədalət və İnkişaf Partiyasının sözçüsü Ömər Çelik də hücumları pisləyərək, "İsrailin hava zərbələri bütün region və dünya üçün təhlükəsizlik təhdidi yaradır" deyib.

Körfəz Əməkdaşlıq Şurası (KƏŞ)

Bəhreyn, Küveyt, Oman, Qətər, Səudiyyə Ərəbistanı və Birləşmiş Ərəb Əmirliklərini əhatə edən Körfəz Əməkdaşlıq Şurası (KƏŞ) hücumları "ən sərt şəkildə" qınayıb. KƏŞ-in Baş katibi Jasem Mohamed Albudaiwi, İsrailin hava zərbələrinin Suriya suverenliyinin "kobud şəkildə pozulması", "beynəlxalq hüquq və normaların pozulması, regional təhlükəsizlik və sabitliyə ciddi təhdid" kimi qiymətləndirib. Albudaiwi KƏŞ-in Suriyanın ərazi bütövlüyünə dəstəyini bir daha təsdiqləyərək, İsrail hücumlarının davamının "məsuliyyətsiz eskalasiya" olduğunu və Suriyada və regionda sabitliyə nail olmaq üçün beynəlxalq səyləri görməzdən gəldiyini vurğulayıb.

Norveç

Norveçin xarici işlər naziri Espen Barth Eide, İsrailin hava zərbələrinin Suriyada sülh yolu ilə keçidə dair səylərə xələl gətirə biləcəyini bildirib. Eide, "son İsrail hava zərbələri və artan daxili gərginliklə bağlı dərindən narahatam. Eskalasiya sülh yolu ilə, Suriyanın özünə məxsus keçidə dair səyləri sarsıtmaq riski daşıyır," deyə qeyd edib. O, Suriyada "şiddətin artmasından" "həyəcanlandığını" və bütün tərəfləri "maksimum təmkinli olmağa" çağırdığını əlavə edib.

24 saat