Bir zamanlar defilələrin və ekranların aranan siması idi. Şöhrət, gözəllik, eşq… Hər şey mövcud idi. Amma Loni Willison üçün həyat, tək bir dönmə nöqtəsi ilə hər şeyi alt-üst etdi. İndi o, keçmişin kölgələri ilə birlikdə küçələrdə yaşayır.
2000-ci illərdə aktyorluq və modellikdə sürətlə yüksələn Willison, “Expose” serialındakı rolu ilə diqqət çəkmiş, Glam Fit və Flavor kimi fitnes jurnallarında yer alaraq adını geniş kütlələrə tanıtdırmışdı. Sahədə parlayan bu ulduz, o dövr karyerasının zirvəsində idi.
HOLLYWOOD NAĞILI QABUSA DÖNÜŞDÜ
2012-ci ildə “Baywatch” serialının ulduzu Jeremy Jackson ilə ailə quran Willison, kənardan baxanda həm karyera, həm də eşq həyatında sabitliyi ələ keçirmiş kimi idi. Lakin həqiqət tamamilə fərqli idi… Evlilikləri qısa müddətdə məişət zorakılığı iddiaları ilə gündəmə gəldi. 2014-cü ildə boşanma ilə nəticələnən bu fırtınalı münasibət, onun həyatındakı ən sərt qırılma nöqtəsi oldu.
Boşanmadan sonra Willison psixoloji problemlərlə mübarizə apararkən, narkotik asılılığı ilə də üzləşməyə başladı. Metamfetamin istifadəsi və ruhi sağlamlıq problemləri onu sürətlə cəmiyyətdən təcrid etdi. 2016-cı ildə çalışdığı estetik klinikasından işdən çıxarılması ilə birlikdə, nəzarət tamamilə itdi. Bu, onun Hollywood parıltısından uzaqlaşaraq küçələrə düşməsinin başlanğıcı idi.
HƏYATINI BİR ALIŞ-VERİŞ ARABASINA SIĞDIRDI
Loni Willison 2018-ci ildən bəri Los Anceles küçələrində yaşayır. Yanında, əşyalarını daşıdığı bir alış-veriş arabasından başqa heç nəyi yoxdur. Mətbuat obyektivlərinə dəfələrlə düşüb; bəzən siqaret çəkərkən, bəzən zibillərin arasında, bəzən də yorğun gözlərlə uzaqlara baxarkən. Keçmişin Hollywood illərindən əsər-əlamət qalmayıb.
“ÇİMMİRƏM, DAHA TƏHLÜKƏSİZ HİSS EDİRƏM”
Onun küçə həyatı bir “seçim” kimi görünməsə də, Willison verdiyi müsahibələrdə bu həyatı öz iradəsi ilə seçdiyini bildirir. Xüsusilə də mümkün cinsi təcavüzlərə qarşı müdafiə mexanizmi kimi uzun müddət duş almamağı üstün tutduğunu açıqlayır. Ailəsinin və dostlarının yardım təkliflərini isə ardıcıl şəkildə rədd edir. Onun acınacaqlı vəziyyəti şöhrətin nə qədər qısa müddətdə dəyişə biləcəyinin acı nümunəsidir.
Willisonun hekayəsi, şou dünyasının parıltılı üzünün arxasındakı kövrəkliyi və görünməyən qaranlıqları bir daha gözlər önünə sərir. Bu hekayə şöhrətin nə qədər keçici, həyatın isə nə qədər kövrək olduğunu xatırladır. Və hər şeyin tək bir qırılma anında necə dəyişə biləcəyini göstərir.