Məhkəmə və prokuror qanunun aliliyini tanımır

Bakı Ağır Cinayətlər Məhkəməsində "Toplum TV işi" üzrə proses davam etdi

Sentyabrın 22-də Bakı Ağır Cinayətlər Məhkəməsində "Toplum TV işi" ilə bağlı növbəti məhkəmə iclası keçirilib. Hakim Azər Tağıyevin sədrliyi ilə baş tutan iclasda təqsirləndirilən şəxslər öz çıxışlarını davam etdiriblər.

Ruslan İzzətli evindəki pulların polis tərəfindən yerləşdirildiyini iddia etdi

III Respublika Platformasının qurucu üzvü Ruslan İzzətli əvvəlki iclasda yarımçıq qalmış çıxışını tamamlayıb. O, 2024-cü ilin martında həbs olunduqdan sonra evindən tapıldığı iddia edilən pulların məhz polis tərəfindən yerləşdirildiyini bəyan edib. Ruslan İzzətli bir sıra suallar ortaya atıb: "Əgər evimə qoyulan pul mənim idisə, niyə həbs olunana qədər onu evdən çıxarmadım? Niyə banka olan ipoteka borcumu ödəmirdim? Niyə martın 8-ə qədər ölkəni tərk etmədim? Cinayətkar idimsə, niyə gizlənmədim, oturub həbsimi gözlədim? Cinayətkar idimsə, niyə Xətai rayon Polis İdarəsində saxlanılan dostlarımla maraqlanmaq üçün polis idarəsinin önünə getdim?" Siyasətçi həmçinin vurğulayıb ki, haqqında məhkəmə qərarı olmadan rəsmilər və hökumətyönlü media orqanları onu qaçaqmalçı kimi təqdim edərək təqsirsizlik prezumpsiyasını pozublar. Ruslan İzzətli bu yanaşmanı Stalin dövrü ilə müqayisə edərək, Azərbaycan hakimiyyətinin tənqidçilərinə qarşı da oxşar metodlardan istifadə etdiyini qeyd edib. O, "Toplum TV işi" ilə bağlı internet televiziyasına yalnız könüllü dəstək verdiyini, bilik və bacarıqlarını burada çalışan gənc könüllülərlə bölüşdüyünü bildirib.

Əli Zeynal həbsini əsassız saydı və həmkarlarına dəstəyini ifadə etdi

Demokratik Təşəbbüslər İnstitutunun əməkdaşı Əli Zeynal çıxışında həbsini əsassız adlandırıb. O, hazırkı siyasi repressiyalar zamanı dostları, müəllimləri və əqidə yoldaşları ilə birlikdə olmaqdan məmnunluğunu dilə gətirib. Zeynal qeyd edib ki, Aynur Elgünəş, Sevinc Vaqifqızı, Nərgiz Absalamova, Elnarə Qasımova, İlkin Əmrahov, Ramil Babayev, Akif Qurbanov, Ruslan İzzətli, Müşfiq Cabbarov, Fərid İsmayılov və Ələsgər Məmmədli kimi həmkarları ilə həbsdə olarkən azadlıqda qalmaq onun üçün daha çətin olardı.

Ələsgər Məmmədli Toplum TV-nin müstəqil missiyasını vurğuladı

Toplum TV-nin həmtəsisçisi Ələsgər Məmmədli uzunmüddətli ictimai fəaliyyətindən bəhs edib. O, media hüququ mövzusunda maarifləndirmə, kitab yazmaq, təlimlər keçmək və konsultasiyalar verməklə məşğul olduğunu söyləyib. Ələsgər Məmmədli cəmiyyətə faydalı olmaq üçün mütləq pula ehtiyac olmadığını, könüllülük, zaman ayırmaq və insanlara kömək etmək istəyinin vacibliyini qeyd edib. O bildirib ki, müasir kommunikasiya vasitələri ilə bir telefon və ya kompyuterlə minlərlə insana çatmaq mümkündür. Ələsgər Məmmədli Toplum TV-nin məhz bu amalın, heç bir dəstək və ya təşkilat olmadan könüllü insanların əməyinin və zamanının bir araya gəlməsinin bəhrəsi olduğunu vurğulayıb. Onun fikrincə, Toplum TV-nin fəaliyyətinin hüquqi müstəviyə daşınmasının səbəbi onun müstəqil peşəkar media platforması olması, bu nümunənin ölkədə mümkünlüyünü cəmiyyətə göstərməsidir. Ələsgər Məmmədli media azadlığına dözümsüzlük səbəbindən həbs olunduqlarını və saxta ittiham aktı ilə təqsirləndirildiklərini əlavə edib. O, Toplum TV-nin fəaliyyətinin dayandırılması ilə bağlı məhkəmə qərarı olub-olmadığı barədə vəsatət verib və məhkəmə bu vəsatəti təmin edib.

"Toplum TV işi" üzrə ittihamlar və hakimiyyətin mövqeyi

"Toplum TV işi" çərçivəsində ümumilikdə 10 nəfərə qarşı cinayət işi açılıb. III Respublika Platformasının spikeri Akif Qurbanov, bu qurumun qurucu heyət üzvü Ruslan İzzətli, Toplum TV-nin həmtəsisçisi Ələsgər Məmmədli, videoredaktor Müşfiq Cabbar, jurnalist Fərid İsmayılov, Demokratik Təşəbbüslər İnstitutunun əməkdaşları Əli Zeynal, İlkin Əmrahov və Ramil Babayev həbs ediliblər. Jurnalist Elmir Abbasov polis nəzarətinə verilib, Toplum TV redaktoru Şahnaz Bəylərqızı isə əvvəlcə ev dustaqlığına buraxılıb, sonra polis nəzarətinə verilməklə qətimkan tədbiri seçilib. "Toplum TV işi" üzrə həbs edilənlər əvvəlcə qaçaqmalçılıqda ittiham olunsa da, sonradan ittiham ağırlaşdırılıb. Onlar bütün ittihamları rədd edərək, həbslərinin siyasi sifariş olduğunu bildirirlər. 2023-cü ilin noyabr ayından bəri Azərbaycanda qruplar şəklində təqribən 30 jurnalist və ictimai fəal qaçaqmalçılıq ittihamı ilə həbs edilib. Azərbaycan hakimiyyəti isə heç kimi peşə və ya siyasi fəaliyyətinə görə təqib etmədiyini, ölkədə bütün hüquq və azadlıqların təmin olunduğunu iddia edir.

24 saat