Məhkəmədə ləyaqətli hakimlərə ehtiyac

“Abzas Media İşi” Üzrə Apellyasiya Məhkəməsi: Jurnalistlərdən Kəskin Reaksiyalar

Sentyabrın 5-də Bakı Apellyasiya Məhkəməsində Abzas Media işi üzrə növbəti iclas keçirilib. Hakim Zəfər Əhmədovun sədrliyi ilə baş tutan prosesdə təqsirləndirilən şəxslər, onların müdafiəçiləri və dövlət ittihamçısı çıxış ediblər.

Jurnalist Nərgiz Absalamovanın vəkili Günay İsmayılova öz nitqində iş materiallarında müvəkkilinin təqsirini sübuta yetirən heç bir dəlilin olmadığını vurğulayıb. Daha sonra çıxış edən Nərgiz Absalamova bank hesablarının dondurulması mövzusuna toxunub. O, “İçində 13 qəpik olan bank kartım da bloklanıb. Mənim 13 qəpiyimə qalıblar. Demək istəyirəm ki, bəli, biz 13 qəpiklik qaçaqmalçılarıq,” deyərək istehzalı şəkildə bildirib. Absalamova, həmçinin, məhkəmənin ədalətsiz olduğunu qeyd edərək əlavə edib: “Arzu edirəm ki, nə vaxtsa ədalətlə qərar verən, hüququ həqiqətən ali hesab edən və özünə hörmət edən hakimlər məhkəmələri idarə edər. Hələlik isə bu məhkəmə oyundan başqa bir şey deyil. Siz də sizə tapşırılan qərarı icra edirsiniz.”

Dövlət İttihamçısının Cavabı və Müdafiə Tərəfinin Tənqidləri

Dövlət ittihamçısı İlkin Yusifov iddiaları təkzib edərək, həm ibtidai, həm də məhkəmə istintaqının ədalətli aparıldığını bəyan edib. O, Abzas Media işi üzrə təqsirləndirilən "Abzas Media" koordinatoru Məhəmməd Kekalovun ibtidai istintaqda verdiyi ifadələrdən imtina etməsinə baxmayaraq, onun ifadələrinin doğruluğunun dəlillərlə sübuta yetirildiyini bildirib. Prokuror Bakı Ağır Cinayətlər Məhkəməsinin çıxardığı hökmlərin qüvvədə saxlanılmasını tələb edib.

Bundan sonra "Abzas Media" direktoru Ülvi Həsənlinin vəkili Zibeydə Sadıqova dövlət ittihamçısına cavab verib. O qeyd edib ki, müdafiə etdiyi Ü.Həsənli və digər təqsirləndirilən şəxslərlə bağlı həbs edildikləri gündən bəri verdikləri heç bir vəsatət təmin edilməyib. Vəkil bu şəraitdə hansı ədalətli araşdırmadan danışmağın mümkünlüyünü sual edib. Digər vəkillər də çıxış edərək müvəkkilləri üçün bəraət tələblərini irəli sürüblər.

Jurnalistlərin Həbs Şəraiti və Ədalət Sualı

Prosesin sonunda təqsirləndirilən şəxslərə də söz verilib. “Abzas Media”nın baş redaktoru Sevinc Vaqifqızı məhkəmə istintaqı dövründə heç bir ciddi şahidin məhkəməyə gətirilmədiyini bildirib. O, həbs edildikləri dövrdən bəri bəzi hüquq-mühafizə orqanları əməkdaşlarının “Bizi başa düşün” dediklərini xatırladaraq kəskin reaksiya verib: “Mən yaxşı anlayıram ki, onlar nəyi nəzərdə tuturlar. Onlar və bu məhkəməni idarə edən siz evinizdə ailənizlə rahat yaşayacaqsınız, yaxşı pullar qazanacaqsınız və biz bunu başa düşməliyik? Bəs burada peşə fəaliyyətini yerinə yetirdiyinə görə həbs edilənləri, içəridə olduğu müddətdə övladı dünyaya gələni, övladının növbəti doğum gününü də görə bilməyəni, həyat yoldaşı ilə evliliklərinin 30 illiyini qeyd edə bilməyənləri kim başa düşəcək? İllərini dəmir barmaqlıqlar arxasında keçirməli olan bizi kim başa düşəcək? Buna görə kim cavab verəcək?”

İş üzrə həbs edilən iqtisadçı və "Azadlıq Radiosu"nun jurnalisti Fərid Mehralızadə də söz alaraq dövlət ittihamçısına cavab verib. O, Məhəmməd Kekalovun ifadələrində onunla bağlı heç bir şey olmasa da, ona hökm oxunduğunu qeyd edib. “Necə olur ki, Məhəmmədin digər 6 nəfərlə bağlı dediklərini doğru qəbul edirsiniz, amma mənimlə bağlı hissəsində yalançı çıxır? Ya da məhkəmə istintaqı zamanı dəvət etdiyiniz şahidlərin yarısı məni tanımadığını, digər yarısı isə iqtisadçı kimi mediadan tanıdığını bildirdi. Niyə onların mənimlə bağlı ifadələri qəbul edilmədi?” deyə Fərid Mehralızadə sual ünvanlayıb. O, həmçinin, ofisinin “Abzas Media”nın ofisi daxilində olduğu iddiasının əsassızlığını vurğulayaraq, anten məlumatlarının çıxarılması tələbinin təmin edilmədiyini bildirib: “Çünki mən “Abzas Media”nın ofisinin harada olduğunu bilmirəm və bir dəfə də olsun orada olmamışam. Amma bu vəsatətimiz təmin edilmədi. Elə isə dövlət ittihamçısı hansı ədalətli məhkəmə araşdırmasından danışır?”

Qərarın Təxirə Salınması və Əvvəlki Hökmlər

Məhkəmə yekun qərarın elanını sentyabrın 9-na təxirə salıb. Xatırladaq ki, iyunun 20-də Bakı Ağır Cinayətlər Məhkəməsində baş tutan iclasda Abzas Media işi üzrə təqsirləndirilən şəxslərə hökm oxunmuşdu. Həmin qərara əsasən, “Abzas Media”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və “Azadlıq Radiosu"nun jurnalisti, iqtisadçı Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “Abzas Media"nın koordinatoru Məhəmməd Kekalov isə 7 il 6 ay azadlıqdan məhrum edilmişdilər. Onlar qaçaqmalçılıq da daxil olmaqla bir neçə maddədə ittiham olunublar. Lakin jurnalistlər və müdafiəçiləri istintaqın tutarlı sübutlar ortaya qoymadığını dəfələrlə bildiriblər.

24 saat