Məşhur deyim gerçək oldu: Qızıl tabutla dəfn

İngiltərədə "Roman icmasının kralı" kimi tanınan Frank Thompson, milyon dollarlıq qızıl tabutla dəfn edilib. İyul ayında 69 yaşında dünyasını dəyişən Thompson üçün ailəsi Roman adət-ənənələrinə uyğun möhtəşəm bir vida mərasimi təşkil edib. Döş qəfəsi infeksiyasından həyatını itirən Thompsonun cənazəsi, xüsusi olaraq hazırlanan saf qızıl tabutda, "Rolls-Royce" markalı avtomobilin içərisində altı gün ərzində İngiltərə ərazisində dolaşdırılıb. Tabut Nottingem və Mançesterdəki məzarlıqlarla yanaşı, ailə üzvlərinin və dostlarının dəfn edildiyi ərazilərdə də "vida səfərinə" çıxarılmışdı. Ailə, Thompson üçün Cənubi Londonda yerləşən bir qəbiristanlıqda nəhəng mərmər məzar tikdirir. İnşası təxminən bir il davam edəcək bu məzarın, Thompsonun xatirəsini əbədiləşdirən bir abidəyə çevrilməsi nəzərdə tutulur.

Qızıl Tabutun Detalları

Ailə üzvləri dəfn mərasiminin maliyyə xərcləri barədə dəqiq məlumat verməsələr də, tabutun "saf qızıldan" hazırlandığını təsdiqləyiblər. Bildirilib ki, tabut xaricdən xüsusi sifarişlə gətirildiyi üçün, çatdırılma prosesi həftələr çəkmiş və bu səbəbdən cənazə təxminən bir ay sonra dəfn oluna bilib.

Mübahisəli Keçmiş: Frank Thompsonun Cinayət Dosyası

Ailəsi və yaxınları Thompsonu "kral" kimi son mənzilə yola salsalar da, onun keçmişi cəmiyyətdə ciddi müzakirələrə səbəb olub. Belə ki, 2011-ci ildə o, üç cinayət ortağı ilə birlikdə yaşlı insanları yollarını və səkilərini təmir etmək vədi ilə aldadaraq dələduzluqla məşğul olduğu aşkarlanmışdı. 65 yaşdan 92 yaşa qədər qurbanlardan 1 milyon 300 min sterlinq məbləğində qanunsuz gəlir əldə edən qrup, ümumilikdə 20 il həbs cəzasına məhkum edilmişdi. Prokurorlar bu dələduzluğu "sistematik cinayət sxemi" olaraq xarakterizə etmişdilər. Thompson və onun komandası, dəyəri 98 pens olan süd qutusunu "qaraj yolu üçün sızdırmazlıq materialı" kimi satmağa cəhd edərkən gizli çəkilmiş bir videonun internetə yayılması ilə ifşa olunmuşdu.

24 saat