Mark Ruffalo Trumpı Qəzzə üçün hərəkət etməyə çağırdı

Qəzzada ağır humanitar vəziyyət: Qurbanlar və beynəlxalq çağırışlar

7 oktyabr 2023-cü il tarixindən bu yana İsrailin hücumları altında olan Qəzzada humanitar böhran dərinləşməkdədir. Əldə olunan məlumatlara görə, bölgədə əksəriyyəti qadın və uşaq olmaqla, ən azı 62 min 622 Fələstinli həyatını itirib, 157 min 673 nəfər isə yaralanıb. Şəhərdə aclıq və qida çatışmazlığından ölənlərin sayı 300-ə çatıb ki, onların 117-si uşaqlardır. İsrail daha əvvəl Qəzzanın işğalı üçün ilk mərhələyə keçdiyini açıqlamışdı.

Mark Ruffalodan dünyaya çağırış: "Bu, insan əli ilə yaradılmış bir fəlakətdir"

Məşhur Hollivud aktyoru Mark Ruffalo Instagram hesabında paylaşdığı videolu mesajda humanitar vəziyyətə diqqət çəkib. O, həlak olanların 80 faizdən çoxunun dinc vətəndaşlar olduğunu vurğulayaraq, ABŞ, Britaniya, Almaniya və digər Avropa ölkələrini konkret addımlar atmağa səsləyib. Ruffalo, "ABŞ prezidenti Donald Tramp, nə isə et. Sən aclıqdan əziyyət çəkən insanlara əhəmiyyət verdiyini, müharibələri bitirmək istədiyini deyirsən, elə isə nə isə et", deyə müraciət edib.

Aktyor, Birləşmiş Millətlər Təşkilatı (BMT) tərəfindən dəstəklənən Qlobal Aclıq Monitorinqi Sistemi (IPC) tərəfindən hazırlanan son hesabatı da xatırladıb: "Bu, insan əli ilə yaradılmış bir fəlakətdir. Bu, dinc əhalini qətlə yetirmək üçün düşünülmüş bir cinayətdir. Bu, İsrail və İsrail ordusu tərəfindən tətbiq edilir. Qəzzanın aclıqdan ölməsinə icazə verilməməlidir və davamlı sülh üçün insanlar öz səslərini ucaltmalıdırlar."

Qəzzada aclıq həddi ən yüksək səviyyədədir

IPC keçən həftə Qəzzada aclığın ən şiddətli, yəni beşinci dərəcəli səviyyədə olduğunu təsbit etdiklərini bəyan etmişdi. Bu, regionda yaranan humanitar vəziyyətin nə qədər kritik olduğunu bir daha sübut edir. Beynəlxalq ictimaiyyətin təcili müdaxiləsi olmadan Birləşmiş Millətlər Təşkilatı da daxil olmaqla bir çox qurum insan tələfatının daha da artacağından narahatdır.

24 saat