Texnologiya nəhəngi Microsoft İsraillə əlaqələri səbəbindən şirkət binalarında keçirilən etiraz aksiyalarında iştirak edən dörd əməkdaşını işdən çıxarıb. Onlardan ikisi bu həftə şirkətin prezidentinin ofisində təşkil olunan oturma aksiyasında iştirak etmişdi.
"No Azure for Apartheid" adlı etiraz qrupunun çərşənbə günü yaydığı bəyanata görə, Anna Hattle və Riki Fameli işdən çıxarıldıqları barədə səsli mesajlar alıblar. Cümə axşamı isə qrup daha iki əməkdaş – Nisrin Cəradat və Yulius Şanın da işdən azad edildiyini bildirib. Bu şəxslər şirkətin qərargahında İsrailin Qəzzada apardığı müharibəyə korporasiyanın dəstəyini pisləyən nümayişçilər arasında idilər.
Şirkət nümayəndələri işdənçıxarmaların korporativ siyasətin ciddi şəkildə pozulması ilə əlaqəli olduğunu bəyan edib. Cümə axşamı verilən açıqlamada, son vaxtlar keçirilən nümayişlərin “ciddi təhlükəsizlik narahatlıqları yaratdığı” vurğulanıb.
Adı şirkətin Azure proqramına istinad edən “No Azure for Apartheid” qrupu rəhbərliyindən İsraillə əlaqələrini kəsməyi və fələstinlilərə təzminat ödəməyi tələb edir. Anna Hattle bəyanatında deyib: “Biz buradayıq, çünki Microsoft İsrailə soyqırım törətmək üçün lazım olan alətləri təmin etməyə davam edir, eyni zamanda öz işçilərini bu reallıq barədə aldadır və yanlış yönləndirir”.
Hattle və Fameli şirkətin prezidenti Bred Smitin ofisini işğal etdikdən sonra çərşənbə axşamı həbs edilən yeddi etirazçı arasında idilər. Digər beş nəfər şirkətin keçmiş əməkdaşları və kənardan gələn şəxslər idi. Smit, korporasiyanın “hər kəsin bu ölkədə qanuni şəkildə ifadə azadlığına malik olmasına hörmət etdiyini” bildirmişdi.
Microsoft-un Azure proqramı ilə bağlı iddialar
Bu ay yayımlanan birgə media araşdırmasında, İsrail ordusunun kəşfiyyat agentliyinin, işğal altındakı İordan çayının qərb sahilində və Qəzza zolağında yaşayan fələstinlilərin mobil telefon danışıqlarının böyük həcmli qeydlərini saxlamaq üçün şirkətin Azure proqramından istifadə etdiyi aşkar edilib.
The Guardian, +972 Magazine və ivrit dilində nəşr olunan “Local Call” tərəfindən aparılan araşdırmada İsrailin fələstinlilərin genişmiqyaslı müşahidəsi üçün texnologiya nəhənginin bulud xidmətlərinə güvəndiyi qeyd olunub. Buna cavab olaraq Microsoft Covington & Burling LLP hüquq firmasını araşdırma aparmağa cəlb etdiyini bildirib.
Digər şirkət əməkdaşları da İsraillə əlaqələrini pisləyərək etiraz aksiyaları keçiriblər. Aprel ayında AI üzrə baş direktor Mustafa Süleymanın şirkətin 50 illik yubiley tədbirində etdiyi çıxış bir əməkdaş tərəfindən bu əlaqələrə görə etirazla yarımçıq kəsilib. Həmin əməkdaş və digər etirazçı işçi də sonradan işdən çıxarılıb.
İsrailin Qəzzaya hərbi hücumu nəticəsində yaranan humanitar fəlakət artdıqca, ac qalan fələstinlilərin, o cümlədən uşaqların görüntüləri qlobal hiddətə səbəb olduğu üçün firmalar və təhsil müəssisələri də İsraillə əlaqələrə görə etirazlarla üzləşib. İsrail 2023-cü ilin oktyabrında müharibəyə başladığından bəri on minlərlə fələstinlini öldürüb, aclığa səbəb olub və Qəzza əhalisinin demək olar ki, hamısını yerindən didərgin salıb.
Oxucu Şərhləri
Şərh Yaz