Müqəddəs Pyotr Bazilikasının 400 illiyi: Vatikan yubiley proqramını açıqladı

Çoxdilli liturgiya platforması və yeni xidmətlər

Müqəddəs Pyotr Bazilikasının təqdis edilməsinin 400 illik yubileyi - Müqəddəs Pyotr Bazilikasının 400 illiyi - Müqəddəs Pyotr Bazilikasının baş keşişi və "Fabbrica di San Pietro"nun prezidenti Kardinal Mauro Qambetti, Müqəddəs Pyotr Bazilikasının təqdis olunmasının 400 illik yubileyi münasibətilə keçiriləcək bir sıra təşəbbüsləri açıqlayıb.

Onun sözlərinə görə, tədbirlər ili fevralın 20-də yeni “Via Crucis”in (Xaç Yolu) açılışı ilə başlayacaq və noyabrın 18-də Papa XIV Levin rəhbərlik edəcəyi Müqəddəs Messa ayini ilə başa çatacaq.

Kardinal Qambetti mənəvi, mədəni və texnoloji yeniliklərlə zəngin olacaq bu ildə zəvvarlar və ziyarətçilər üçün yeni xidmətlərin tətbiq ediləcəyini bildirib. O, Kommunikasiya üzrə Dikasteriya və süni intellekt əsaslı dil həlləri sahəsində qlobal lider olan “Translated” şirkəti ilə birgə hazırlanan çoxdilli liturgiya platformasının yaradıldığını qeyd edib.

Bu platforma smartfonlar vasitəsilə əlçatan olan və süni intellektə əsaslanan sinxron tərcümə imkanı yaradacaq. Bu, dindarlara əsas mərasimləri öz seçdikləri dildə izləməyə şərait yaradacaq. Bazilikanın girişində və müxtəlif nöqtələrində yerləşdiriləcək QR kodları skan etməklə xüsusi veb-səhifəyə daxil olmaq mümkün olacaq. Bu səhifə heç bir proqram yükləmədən və ya xüsusi avadanlıqdan istifadə etmədən həm səsli, həm də mətnli tərcüməni təmin edəcək.

İndiyədək bağlı olan məkanlar ziyarətçilərə açılır

Kardinal həmçinin bildirib ki, monumental kompleksin əvvəllər bağlı olan hissələri ictimaiyyət üçün açılacaq. Bura üç yelpik formalı hissədən ibarət bütün terras və Gənc Antonio da Sanqallonun hazırladığı Bazilika modelinin və Mikelancelonun Günbəzinin maketlərinin yerləşdiyi Səkkizbucaqlı Zallar daxildir. Həmçinin, Bazilikanın muzey arxivindən olan əsərlər də burada nümayiş etdiriləcək.

Qambetti əlavə edib ki, “Smart Pass” adlı yeni real vaxt rejimində işləyən rezervasiya sistemi məkanın müqəddəsliyini qorumaqla yanaşı, ziyarətçi axınını tənzimləməyə kömək edəcək. Genişləndirilmiş rəqəmsal ekosistem isə zəvvarlara öz dualarını və təəssüratlarını paylaşmaq imkanı verəcək.

Mənəvi tədbirlər və yenilənmə proqramı

Bazilikanın baş keşişi həftəlik “Mənəvi Yüksəlişlər” adlı dua və müqəddəs musiqi tədbirlərinin, eləcə də Müqəddəs Pyotr haqqında pastoral mühazirələrin və Müqəddəs Yazıların təfsirinin keçiriləcəyini açıqlayıb. Proqrama, həmçinin, Romada Müqəddəs Pyotr və Pavelin addım izlərini təqib edən xüsusi bir ziyarət marşrutu və iyunun 29-da Müqəddəs Pyotr və Pavelin anım mərasimi yaxınlığında teatr tamaşası da daxildir.

Sonda Kardinal, “Fabbrica di San Pietro” və İtaliyanın çoxmillətli enerji şirkəti Eni-nin “Görünəndən o yana” adlı birgə layihəsini təqdim edib. Bu layihə inteqrasiya edilmiş və daimi struktur monitorinqi vasitəsilə Vatikan bazilikasının struktur sabitliyini qorumaq məqsədi daşıyır.

“Michelangelus” adlı yeni şrift təqdim olunur

Əlavə olaraq, Kardinal Qambetti Vatikanın yeni institusional şriftini təqdim edəcəyini bildirib. Bu şrift Buonarrotinin əl yazısından ilhamlanaraq “Studio Gusto” tərəfindən hazırlanıb və “Michelangelus” adlandırılacaq. Yeni şriftin Microsoft Office paketinə daxil edilməsi nəzərdə tutulur.

Kardinal Qambetti çıxışını yekunlaşdırarkən qeyd edib ki, bir zamanlar Papa II Yuli yenilənmək üçün yenidən qurmalı idisə, bu gün qabaqcıl texnologiyalar sayəsində yenilənmə söküntü olmadan da baş verə bilər. O, əminliklə vurğulayıb ki, bu texnologiyalar Müqəddəs Pyotr Bazilikasının gələcək əsrlər boyu da zəvvarları qarşılamağa davam etməsinə imkan verəcək.

24 saat