NATO-nun qərargahında casusluq şoku: Təcrübəçi həbs edilib

NATO-nun mənzil-qərargahında casusluq qalmaqalı: Təcrübəçi saxlanıldı

NATO-nun Brüsseldə yerləşən mənzil-qərargahında ciddi təhlükəsizlik pozuntusu qeydə alınıb. Təşkilatda təcrübə keçən bir şəxs casusluq şübhəsi ilə saxlanılıb. İlkin məlumatlara əsasən, həbs olunan şəxs Kanada vətəndaşıdır və əslən Çindəndir.

Almaniyanın nüfuzlu "Spiegel" nəşrinin xəbərinə görə, hüquq-mühafizə orqanları uzun müddətdir ki, həmin şəxsin hərəkətlərini izləyirmiş. İstintaq çərçivəsində onun NATO-nun məxfi sənədlərinə və məlumatlarına qanunsuz çıxış əldə etməyə cəhd göstərdiyi ehtimal olunur.

Hələlik rəsmi qurumlar hadisə ilə bağlı açıqlama verməsə də, bu insident alyans daxilində ciddi narahatlıq doğurub. NATO rəhbərliyi təhlükəsizlik qaydalarının yenidən nəzərdən keçirilməsi və kadrların yoxlanılması prosesini daha da sərtləşdirib.

Ekspertlər bu hadisəni NATO-nun kiber və kəşfiyyat təhlükəsizliyinə qarşı yönəlmiş artan təhdidlərin tərkib hissəsi kimi xarakterizə edirlər. Hazırda istintaq davam edir və saxlanılan şəxsin əlaqələrinin dairəsi araşdırılır.