Özkan Uğurun yoxluğundan iki il oğlu Alişan Uğurdan kövrək mesaj

Aktyor və məşhur Mazhar-Fuat-Özkan (MFÖ) qrupunun sevilən üzvü aktyor Özkan Uğur 2023-cü il iyulun 8-də xərçəng xəstəliyi səbəbindən müalicə aldığı xəstəxanada həyatını itirmişdi. O, musiqi dünyasına bəxş etdiyi saysız-hesabsız unudulmaz əsərlərlə yaddaşlarda dərin iz qoyub. "Ele Güne Karşı", "Peki Peki Anladık", "Ali Desidero" və "Güllerin İçinden" kimi mahnıları hələ də milyonlarla dinləyicinin ürəyində yaşayır. Bu gün, sənətçinin ikinci ölüm ildönümündə, ailəsi və pərəstişkarları onu dərin kədər və sevgi ilə anır.

"HARAYA GETSƏM DƏ, HƏMİŞƏ SƏN VARSAN"

Sənətçinin oğlu Alişan Uğur atası ilə çəkdirdiyi fotoları sosial media hesabında bu qeydlə paylaşıb: "Sevimli atamı son mənzilə yola salandan iki il ötür. Bir gün, bir an belə səni düşünmədiyim vaxt olmur. Nə etsəm də, haraya getsəm də, həmişə sən varsan. Səni sözlərlə ifadə edə bilməyəcəyim qədər çox darıxıram, darıxırıq. Unudulmazsan."

"BOŞLUĞUN DOLMUR, SEVGİN TÜKƏNMİR"

Sənətçinin həyat yoldaşı Aysun Aslan Uğur da onun konsert videosunu bu mesajla yayımlayıb: "Özkanımız aramızdan gedəli iki il oldu. Boşluğun dolmur, sevgin bitmir mənim əziz insanım. Mələk ruhlum, mənim eşqim, nur içində yat. Unudulmazsan…"

24 saat