Qəzza üçün kritik gün: İsrail ordusundan vacib qərar gözlənilir

İsrail ordu radiosunun məlumatına görə, Baş Qərargah rəisi Zamir, Qəzza şəhərinin işğal planlarını təsdiqləmək məqsədilə bu gün Cənub Bölgəsi Komandanlığı ilə görüşəcək.

"Təxliyə ilə Məhdudlaşmır"

Məlumatda, planın "əvvəllər qeyd edildiyi kimi şəhər sakinlərinin təxliyəsi ilə məhdudlaşmadığı, həmçinin Qəzza şəhərinin tamamilə mühasirəyə alınmasını və əməliyyat nəzarətinin təmin edilməsini də əhatə etdiyi" qeyd edilib.

"Bir Neçə Həftə İçində Başlayacaq"

Müəyyən edilmiş cədvəlin sürətləndirilməsi üçün Qəzza şəhərinin mərkəzinə quru əməliyyatının bir neçə həftə ərzində başlaması və fələstinlilərin şəhərdən köçürülməsi nəzərdə tutulduğu bildirilir. Bundan sonra İsrail ordusunun Qəzza zolağının cənubunda nəzarət etdiyi ərazilərin bir hissəsindən çıxmaq məcburiyyətində qalacağı və həmin ərazilərin köçkün fələstinlilərin sığınması üçün sözdə "yeni bir humanitar zonaya" çevriləcəyi ifadə edilib.

Nə Baş Vermişdi?

İsrail Təhlükəsizlik Kabineti avqustun 8-də regionun şimalında yerləşən Qəzza şəhərinin işğal planlarına razılıq vermişdi. Baş nazir Binyamin Netanyahu kabinet iclasından əvvəl verdiyi müsahibədə Qəzza zolağının tamamilə işğal olunmasını hədəflədiklərini bildirmişdi. İsrail İctimai Yayım Təşkilatı KAN da ordunun Qəzza şəhərini işğal etməyi hədəfləyən hərbi əməliyyatı sürətləndirməyə hazırlaşdığını açıqlamışdı. İsrail mediasında yayılan xəbərlərdə də ordunun Qəzzanın qalan hissəsini işğal etmək əmri aldığı, lakin bu addımın sentyabr ayından əvvəl reallaşmasının gözlənilmədiyi vurğulanmışdı. Plana görə, ilk mərhələdə Qəzza şəhəri işğal ediləcək, təxminən bir milyon fələstinli cənuba köçürüləcək, şəhər mühasirəyə alınacaq və güclü hücumlar təşkil ediləcək. İkinci mərhələdə isə böyük ölçüdə xarabalığa çevrilmiş Qəzzanın mərkəzindəki qaçqın düşərgələrinin işğalı nəzərdə tutulur. İsrail 1967-ci ildən 2005-ci ilə qədər 38 il ərzində Qəzza zolağını işğal altında saxlamışdı. Bu gün təxminən 2.4 milyon fələstinlinin yaşadığı Qəzza zolağı 18 ildir ki, ağır blokada altındadır.

24 saat