Qalatasaray Osimhen və Saneni transfer etdi

Rams Parkında möhtəşəm imza mərasimi və yeni forma təqdimatı

İstanbulun Rams Parkında "Qalatasaray" klubu ilə İtaliyanın "Latsio" komandası arasında keçiriləcək hazırlıq oyunundan əvvəl möhtəşəm bir tədbir baş tutub. Futbol dünyasının iki ulduzu, Viktor Osimhen və Leroy Sane rəsmi olaraq "Qalatasaray"la müqavilə imzalayıblar. Bu imza mərasimi, həmçinin "Qalatasaray" futbolçularının bu mövsüm geyinəcəyi alternativ formanın təqdimatına da ev sahibliyi edib.

İmza mərasimi zamanı "Qalatasaray"ın prezidenti Dursun Özbek və klubun idarə heyətinin sədr müavini Abdullah Kavukçu da iştirak ediblər. Prezident Özbek səhnəyə çıxarkən, "Qalatasaray" azarkeşləri coşğulu şüarlar və alqışlarla onu qarşılayıblar.

Dursun Özbekdən iddialı açıqlamalar: Avropanın zirvəsinə doğru

Azarkeşlərin "Böyük Başkan" şüarları ilə qarşılanan "Qalatasaray"ın prezidenti Dursun Özbek, bu transferlərin əhəmiyyətini vurğulayıb: "Əziz "Qalatasaray"lılar, qəlbi sarı-qırmızı rənglərlə döyünən qardaşlarım. Futbol komandamıza yeni qoşulan iki dəyərli oyunçumuzun imza mərasimində, Rams Parkda "Latsio" oyunu öncəsi bir araya gəlmişik. Hamınızı salamlayıram. Çempion komanda olaraq çox sevincliyik, qürurluyuq və xoşbəxtik. Bu uğurda əməyi olan klubumuza, idarə heyəti yoldaşlarıma, baş məşqçi Okan Buruka və bütün futbolçularımıza təşəkkür edirəm. Rəqabət apardığımız hər yerdə komandamızı dəstəkləyən siz azarkeşlərimizə də minnətdaram. Qarşımızda yeni və daha böyük hədəflər var. "Qalatasaray"ı əvvəl etdiyimiz kimi, Avropanın zirvəsinə daşımaq arzusundayıq. Bu məqsədə çatmaq üçün iki çox önəmli transfer etdik. Almaniya milli komandasının ən vacib oyunçularından biri olan Leroy Sane, indi sarı-qırmızı formanı geyinəcək. Bu transfer ilə hər kəsi təəccübləndirdik, hər kəsi qısqandırdıq. Sane-yə xoş gəldin deyirəm və bizə güvəndiyi üçün təşəkkür edirəm. Ötən mövsüm göstərdiyi performansla təkcə "Qalatasaray"lıların deyil, bütün futbolsevərlərin ürəyində taxt qurub. Özü bizimlə ürəkdən bağ qurub. Burada olmasında klubumuzun göstərdiyi fədakarlıq qədər, onun da göstərdiyi bağlılıq var. Böyük klubları rədd edərək "Qalatasaray"ı seçdi. Yeni mövsümün başlamasına çox az qalıb. Türkiyənin ilk nailiyyətlərini qazanan klubumuz üçün yeni hədəflər vaxtıdır. Altıncı ulduzun ilk hədəfi olaraq, 26-cı çempionluq üçün yola çıxırıq. Necə ki, beşinci ulduzda diqqətimizi cəmləmişdik, altıncı ulduza da çatacağıq. Yaşasın "Qalatasaray"!"

"Qalatasaray" prezidenti Dursun Özbekin çıxışından sonra Leroy Sane səhnəyə gələrək müqaviləsini imzalayıb. Azarkeşləri salamlayan və onlara təşəkkür edən Sane, alqışlarla səhnədən ayrılıb. Daha sonra səhnəyə Viktor Osimhen çıxıb və "Salam "Qalatasaray", çox təşəkkür edirəm" deyərək müqaviləsini imzalayıb.

Şəkil çəkilişindən sonra təşkil edilən imza mərasimi sona çatıb.

24 saat