Qara Cümə narahat alıcıları böyük endirimlərlə cəlb edə bilər

ABŞ-da ilin əksər hissəsi gömrük rüsumları və yaşayış xərclərinin yüksəlməsi ilə keçsə də, amerikalılar bayramları qeyd etməyə hazırlaşırlar. Mağazaların alıcıları alış-verişə həvəsləndirmək üçün son illərin ən böyük endirimlərini təqdim edəcəyinə dair əlamətlər var.

Bayram alış-verişində yeni trendlər

Sənaye ticarət qrupu olan Milli Pərakəndə Satış Federasiyası (National Retail Federation) daha bir rekord mövsüm proqnozlaşdırır. İlk dəfə olaraq, amerikalıların hədiyyələrə, yeməklərə və bəzəklərə 1 trilyon dollardan çox xərcləyəcəyi bildirilir. Bu optimist proqnoz ötən il olduğu kimi satışların təxminən 4% artacağını göstərir. Deloitte kimi digər təxminlər isə satış artımının 3% civarında olacağını düşünür. Buna baxmayaraq, bu mövsüm ilin əvvəlində, ABŞ prezidenti Donald Trampın demək olar ki, bütün idxala gömrük rüsumları tətbiq etməyə başladığı zaman qorxulan fəlakətdən uzaq olacaq. ABŞ-da istehlak xərcləri əsasən daha varlı ailələr tərəfindən dəstəklənir. Aşağı gəlirli alıcılar büdcələrini sərtləşdirməklə təzyiq altındadırlar. Lakin gəlirdən asılı olmayaraq, alıcılar qiymətə uyğun keyfiyyət axtarışındadırlar. Məsələn, ərzaq mağazalarında insanlar brend məhsullara daha çox pul ödəməkdən imtina edərək, mağaza brendlərinə keçirlər. Home Depot-da isə insanlar məişət texnikası alışını azaltsalar da, aldıqda daha təkmil və funksional modellərə üstünlük verirlər. Buna görə də, bayramlarda bu, yüksək keyfiyyətli bir hədiyyəyə xərc çəkmək demək ola bilər. Pittsburghdakı Ross Park Ticarət Mərkəzində 22 yaşlı Marissa McKyun və 23 yaşlı Logan Koegler, Koegler üçün erkən Milad hədiyyəsi almaq məqsədilə gəliblər: "Apple Watch aldım," deyə McKyun gülərək bildirir. Cütlük ticarət mərkəzindən ikinci hədiyyə — Stanley fincanı ilə ayrılıb. Qeydiyyatlı tibb bacısı olan Koegler: "Məzun oldum və indi işim var," dedi. "Beləliklə, tələbə olarkən ala bilmədiyim Milad hədiyyələrini indi ala bilirəm."

Daha yaxşı endirimlər gözlənilir

İnsanların getdikcə imtina etməyə başladığı şeylər isə kiçik, spontan əlavələrdir – corab doldurmaq üçün və ya özünə hədiyyə olaraq alına biləcək bir şam və ya əl kremi kimi əşyalar. Spencer, Massachusettssdəki Klem's universal mağazasının idarəçisi Jessica Bettencourt qeyd edir: "Müştərilər bəlkə də əvvəllər aldıqları bəzi əlavə əşyaları almamağa başladılar. Onlar it yeməyi alırlar, amma bəlkə də onunla birlikdə iki it oyuncağı almırlar. Müştərilərin nədən imtina edəcəyini proqnozlaşdırmaq həqiqətən çətindir." Alıcıların bu seçiciliyi mağazaların insanların cibinə girmək üçün son illərin ən böyük endirimlərini təklif etməyə hazırlaşması ilə nəticələnib. Bettencourt deyir: "Bu il daha böyük endirimlər olacaq, buna zəmanət verirəm. Bəzi kateqoriyalar – məsələn, Milad bəzəkləri – indi bir qədər yavaş gedir, buna görə də, biz onları yəqin ki, daha tez endirimə salacağıq." Onlayn əməliyyatları izləyən Adobe Analytics, Qara Cümə həftəsonu üçün elektronika və oyuncaqlar daxil olmaqla, ötən illə müqayisəli — 28%-ə qədər endirimlər proqnozlaşdırır. Geyimdə endirimlərin isə ötən ilə nisbətən bu il daha dərin olacağı gözlənilir. Adobe Qara Cümədə televizorlar, oyuncaqlar və məişət texnikası üzrə ən yaxşı endirimlərin ola biləcəyini proqnozlaşdırır.

Narahatlıqlar fonunda bayram əhval-ruhiyyəsi

Gömrük rüsumlarının bayramlara əvvəllər qorxulduğu qədər təsir etməməsinin böyük səbəblərindən biri, Tramp administrasiyasının onları ilkin təhdidlərdən daha yavaş şəkildə tətbiq etməsidir. Aylarla davam edən gecikmələr və yenidən danışıqlar şirkətlərə qiymətli vaxt qazandırıb; xüsusilə böyük pərakəndə satıcılar malları yığıb və ya xərclərin bir hissəsini özləri ödəməklə, ya da təchizatçıları buna məcbur etməklə qiymətlərin yüksəlməsinin qarşısını alıblar. Üstəlik, istehlakçı əhval-ruhiyyəsinin University of Michigan tərəfindən aparılan aylıq sorğunun tarixindəki ən aşağı səviyyəyə yaxın qalmasına baxmayaraq, insanlar bayram ab-havası üçün xərcləməyə hazır görünürlər. Alıcılar Hellouin üçün böyük maraq göstərərək, rekord xərclər qoydular, hətta məktəbə hazırlıq alış-verişi də güclü oldu. Yüksək gəlirli alıcılar bu istehlak xərclərinin böyük hissəsini təşkil edir. İşsizlik səviyyəsi artmayıb və əmək haqları ümumiyyətlə inflyasiyadan daha sürətli artır. Həmçinin, kredit kartı borcları artıb və daha çox insan "İndi Al, Sonra Ödə" (Buy Now Pay Later) xidmətlərinə üz tutur. Target şirkətinin icraçı direktoru Rick Gomez ötən həftə investorlara bildirdi ki, "Bayramlara yaxınlaşdığımız üçün bilirik ki, istehlakçılar ehtiyatlı olaraq qalırlar," əlavə edərək, iş, qiymətlər və gömrük rüsumları ilə bağlı narahatlıqlar fonunda əhval-ruhiyyənin "aşağı" olduğunu qeyd etdi. "Lakin onlar emosional olaraq motivasiyalı qalırlar. Onlar çox xərcləmədən sevdikləri ilə bayramı qeyd etmək istəyirlər."

24 saat