Restoranlarda asılan atributlar: Nəzarət yox

Kommunist Fəalların Həbsi: İttihamlar və Mübahisəli İddialar

Noyabrın 26-da hökumətyönlü mətbuatda kommunist fəallar Abdulla İbrahimli və İbrahim Əsədlinin polis tərəfindən saxlanılması haqqında xəbər yayıldı. İlkin məlumatlarda onların Bakıda SSRİ bayrağı ilə yürüş keçirdikləri, "başqa bir dövlətin dəstəyi və maliyyəsi hesabına" ofis icarəyə götürdükləri və ofisdə aparılan axtarış zamanı "kommunist ideologiyasının təbliğinə dair materialların" aşkar edildiyi bildirilib. Sözügedən yürüş noyabrın 7-də "Böyük Sosialist İnqilabı"nın 108-ci ildönümündə baş tutub və yürüşdən çəkilmiş video sosial şəbəkələrdə məhz həmin gün paylaşılıb. Həbs xəbərindən bir gün sonra Nizami Rayon Məhkəməsində keçirilən prosesdə hər iki fəal barəsində 3 ay həbs qətimkan tədbiri seçildiyi açıqlanıb. Məlumatlara görə, Abdulla İbrahimli və İbrahim Əsədli Cinayət Məcəlləsinin 233-cü maddəsi (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) ilə ittiham olunublar. Saxlanılan şəxslərin ittihama münasibəti hələ ki məlum deyil, onların vəkili ilə əlaqə cəhdləri isə nəticəsiz qalıb.

İbrahim Əsədli ilə Bağlı Alternativ Versiya

Təqsirləndirilən şəxslərdən İbrahim Əsədli ixtisasca onkoloq olaraq, Valeologiya və İnteqrativ Nəbatət Mərkəzinin rəhbəridir. Onun yaxınlarından biri adının açıqlanmaması şərtilə bildirib ki, bu işdə "kommunizm əslində bəhanədir". İddiaya görə, Səhiyyə Nazirliyi ilə İbrahim Əsədli arasında məhkəmə çəkişməsi mövcud olub və həkim məhz bu səbəbdən cəzalandırılıb. Mənbə qeyd edib ki, İbrahim Əsədli xərçəng xəstəliyinin müalicəsində dərmanların deyil, bitkilərin istifadəsini müdafiə edib və bu mövzu ilə bağlı internet televiziyalarında çıxışlar edib. Nəticədə, Səhiyyə Nazirliyi onun həkimlik praktikasına mane olmağa çalışıb. Hətta bir ay əvvəl İbrahimi "Loğmed" klinikasında icarəyə götürdüyü otağı bağlamağa məcbur ediblər. Yaxınları, bayraq məsələsinin isə Abdulla İbrahimlinin "TikTok" səhifəsində şou-biznes nümayəndələri ilə yaşadığı mübahisələr fonunda daha sonra səs-küyə səbəb olduğunu bildirib.

Simvolların Hüquqi Statusu və Ekspert Rəyləri

İbrahim Əsədlinin yaxınlarının sözlərinə görə, yürüşdə istifadə olunan bayraqlar və ofisdən "tapılan" medallar "Temu" satış saytından əldə olunub. Həmçinin, ofisdən götürüldüyü deyilən kitabların, əsasən, psixologiya mövzusunda, Oşo əsərləri olduğu qeyd edilib, lakin mətbuatda yayılan kadrlarda bunlar görünməyib. Bu iddiaların həqiqətdən nə qədər uzaq olmasından asılı olmayaraq, saxlanılan şəxslərin həbsində kommunizm təbliğatının və SSRİ bayrağının vurğulanması suallar yaradıb. Çünki Azərbaycanda bu ideologiya və onun atributları qadağan edilməyib. "Tribunat" hüquqi maarifləndirmə platformasının mövzu ilə bağlı analizi göstərir ki, Azərbaycanda keçmiş Sovet simvollarının daşınması və nümayiş etdirilməsi "hər hansı məsuliyyət növü yaratmır və kommunist ideologiyasını təbliğ etdiyi deyilən bu şəxslərin əməllərində Cinayət Məcəlləsinin 233-cü maddəsinin tərkib əlamətləri yoxdur". Hüquqşünas Ruslan Əliyev də bu cinayət işinin "hüquqa, qanuna və əxlaqa zidd" olduğunu vurğulayıb. O qeyd edib ki, kommunist partiyası və ideologiyası nasizm deyil ki, qadağan edilsin; əksinə, ciddi elmi əsaslara malik universal ideologiyadır və Azərbaycanın tarixində uzunmüddətli respublikanı formalaşdıran, ölkəni sənaye inqilabına aparan yeganə dövlət Azərbaycan Sovet Sosialist Respublikası olub. R.Əliyev bu hadisəni siyasi ayrı-seçkilik və dözümsüzlük kimi qiymətləndirərək, təqsirləndirilən şəxslərin işi Avropa İnsan Hüquqları Məhkəməsinə gedəcəyi təqdirdə, onlara hüquqi dəstək verməyə hazır olduğunu bildirib.

24 saat