Ronaldo 2026 Dünya Kubokundan sonra karyerasını bitirir

Futbolçu karyerasının sonu yaxınlaşır

Cristiano Ronaldo yaxın bir-iki il ərzində peşəkar futbol karyerasını bitirəcəyini açıqlayıb. Portuqaliyalı hücumçu, 2002-ci ildə "Sportinq"də debüt etdikdən sonra klub və ölkə komandaları üçün 950-dən çox qol vuraraq əfsanəvi bir yol keçib. O, ailəsinə daha çox vaxt ayırmaq üçün tezliklə təqaüdə çıxacağını bildirib.

Hazırda Səudiyyə Ərəbistanının "Əl-Nəsr" klubunda çıxış edən Ronaldo, müqaviləsini 2027-ci ilə qədər uzadıb. 40 yaşlı futbolçu, kolleksiyasında çatışmayan yeganə böyük titul olan 2026-cı il Dünya Kubokunu hədəfləyir.

"Tezliklə" dedikdə bəziləri 10 il başa düşsə də, Ronaldo bu fikrin zarafat olduğunu qeyd edib. O, hazırda meydanda olmaqdan həzz aldığını və özünü yaxşı hiss etdiyini bildirib: "Bildiyiniz kimi, futbolda müəyyən yaşa çatanda aylar çox sürətlə keçir. Hal-hazırda özümü çox yaxşı hiss edirəm. Qollar vururam, hələ də sürətli və iti olduğumu düşünürəm. Milli komandada oynamağımdan zövq alıram. Lakin, dürüst olaq, "tezliklə" dedikdə yəqin ki, bir və ya iki ili nəzərdə tuturam."

Dünya Kuboku: Son böyük turnir

Portuqaliyanın 2026-cı il Dünya Kubokuna vəsiqə qazanmaq ərəfəsində olduğu bir vaxtda, Cristiano Ronaldo ABŞ, Kanada və Meksikada keçiriləcək turnirin onun futbolun ən böyük səhnəsindəki son çıxışı olacağını təsdiqləyib.

“Əlbəttə ki, bəli, çünki o vaxt 41 yaşım olacaq,” bütün zamanların bombardiri olaraq 143 beynəlxalq qolla rekorda imza atan Ronaldo deyib. “Mən futbol üçün hər şeyimi verdim. Son 25 ildə bu oyunda olmuşam. Hər şeyi etdim. Müxtəlif klublarda və milli komandalarda bir çox rekordlara sahibəm. Bununla həqiqətən fəxr edirəm. İndi anın dadını çıxaraq, anı yaşayaq.”

Cristiano Ronaldo tarixin ən yaxşı futbolçularından biri kimi xatırlanacağını bildiyini söyləyib.

Varisi haqqında düşüncələr

Lakin, oğlu Cristiano dos Santos Jr. da atasının yolunu davam etdirərək Portuqaliya U-16 komandasında oynayır. Bəs o, atasından daha yaxşı futbolçu ola bilərmi?

"İnsan olaraq heç kimin bizdən yaxşı olmasını istəmərik. Lakin mən övladlarımın məndən daha yaxşı olmasını arzulayıram. Ona heç vaxt qısqanclıq etməyəcəyəm," o deyib. "Mən ona təzyiq etmək istəmirəm, çünki onun xoşbəxt olmasını istəyirəm. Futbol oynamaq istəyirsən, ya başqa bir idman növü, fərqi yoxdur. Xoşbəxt ol, azad ol. Atanın təzyiqi altında olma, çünki bu çoxdur."

Ronaldo bunun yeni bir nəsil, fərqli bir nəsil olduğunu qeyd edib. "Onlar fərqli düşünür, fərqli yaşayırlar. Lakin bir ata olaraq, onun nə olmaq istədiyini həyata keçirməsinə kömək etmək üçün buradayam. Mən onun dayağı olacağam."

24 saat