Ukraynanın şərqində, Donetsk vilayətində yerləşən Dobropilya qəsəbəsi çərşənbə axşamı axşam
Rusiya qüvvələrinin endirdiyi hava zərbəsi ilə sarsılıb.
500 Kiloqramlıq Bomba Hücumu
Məlumatlara görə, Rusiya mülki əhalinin sıx yaşadığı bir alış-veriş mərkəzinə 500 kiloqramlıq bomba atıb. Hücum nəticəsində azı 2 nəfər həyatını itirib, onlarla insan yaralanıb.
Şəhər Mərkəzi Hədəf Alınıb
Yerli rəsmilərin bildirdiyinə görə, hücum nəticəsində təxminən 300 mənzil, 50-dən çox mağaza və 8 avtomobil zərər görüb. Donetsk valisi Vadym Filashkin Telegram vasitəsilə etdiyi açıqlamada deyib: "Ruslar bir daha izdihamlı bir ərazini, şəhərin tam mərkəzindəki bir alış-veriş mərkəzini qəsdən hədəf alıblar."
Ukrayna prezidenti Volodimir Zelenski də hücumla bağlı gecə etdiyi xalqa müraciətində "Bu hücumun heç bir hərbi məntiqi yoxdur. Tamamilə dəhşətlidir," – deyərək etirazını bildirib.
ABŞ-ın Açıqlamalarından Sonra
Hücum ABŞ prezidenti Donald Trampın
Ukraynaya milyardlarla dollarlıq silah yardımını NATO vasitəsilə göndərəcəyini bəyan etməsindən dərhal sonra baş verib. Bundan əlavə, ABŞ prezidenti Donald Tramp Rusiyanın əsas ticarət tərəfdaşlarına 100 faiz gömrük tarifi tətbiq edə biləcəyini də açıqlayıb. ABŞ-ın Ukrayna üzrə xüsusi nümayəndəsi General Keith Kellogg hazırda Kiyevdə, ABŞ-ın Ukraynaya verəcəyi dəstək mövzusunda təmaslar aparır.
"Silah Versəniz, Vura Bilərik" İddiaları
Digər tərəfdən, son günlərdə ABŞ prezidenti Donald Trampın Zelenskiyə etdiyi telefon zəngində "Moskvanı vura bilərsənmi?" deyə soruşduğu barədə iddialar gündəmi zəbt etmişdi. Zelenskinin cavabının "Əgər silah versəniz, vura bilərik" şəklində olduğu qeyd edilib. Lakin Ukrayna lideri daha sonra verdiyi açıqlamada Moskvanı hədəf almaq niyyətində olmadığını, uzunmənzilli silahlardan istifadə etməyəcəklərini deyib. ABŞ prezidenti Donald Tramp isə sonradan mövzu ilə bağlı "Xeyr, Moskvanı vurmaq olmaz. Heç kimin tərəfində deyiləm, insanlığın tərəfindəyəm," – deyə bildirib.
Müharibə Yenidən Gərginləşir
Dobropilya cəbhə xəttinə cəmi 20 kilometr məsafədə yerləşir və son aylarda dəfələrlə hücuma məruz qalıb. Mart ayında keçirilən başqa bir zərbədə 5-i uşaq olmaqla 11 nəfər həyatını itirmişdi.
Rusiya son dövrdə hava zərbələrini gücləndirərək, gecə ərzində atdığı raketlərin sayında rekordlar qırır. Birləşmiş Millətlər Təşkilatına görə, təkcə keçən ay 230-dan çox mülki şəxs həyatını itirib; bu,
müharibənin başladığı 2022-ci ildən bəri bir ayda qeydə alınan ən yüksək mülki tələfat sayıdır.
Rusiyadan Yeni Hücumlar
Digər tərəfdən,
Rusiya da
Ukraynanın təşkil etdiyi hava hücumları ilə qarşı-qarşıya qalıb. Moskva və Sankt-Peterburqa yönələn çox sayda Ukrayna pilotsuz uçuş aparatının (PUA) zərərsizləşdirildiyi, Belqorod vilayətində isə bir nəfərin öldüyü, altı nəfərin yaralandığı açıqlanıb. Hər iki tərəfdə gərginlik getdikcə artarkən, beynəlxalq ictimaiyyətin diqqəti həm Moskvanın addımlarına, həm də ABŞ-ın
Ukrayna siyasətinə yönəlib.
24 saat
